Timersornermi Nunatsinni pissartanngorniuttoqarsinnaanngorpoq
Kalaallit Nunaanni Timersoqatigiit Kattuffianni siulittaasup Nuka Kleemannip timersuutini assigiinngitsuni apriilip 18-ata tungaanut pissartanngorniuttoqarsinnaalernera nuannaarutigaa.
Namminersorlutik Oqartussanit peqqussut nutaaq atuutilereersoq timersornermi Nunatsinni pissartanngorniuttoqarsinnaalerpoq.
Peqqussutip nutaap atuutilereernerani februarip ulluisa 16-aniit aprilip ulluisa 18-ata tungaanut killilersuutit kommunit akimorlugit unammisitsisoqarsinnaanngorpoq.
Taamaasilluni timersuutini ukunani: futsal, sulorarneq, ujakkaarneq, voilleuball, issittormiut timersutaat, snowboard - Nunatsinni pissartanngorniuttoqarsinnaalerpoq aprilip 18-ata tungaanut.
- Soorunami unammersuaartitsisoqarsinnaaneranik ammaasoqarnera nuannaarutigaarput. Maanna ukioq ataaseq piareersimareerpugut unammersuaartitsinissanut. Neriuppunga kattuffiit periarfissaq atorluassagaat, Kalaallit Nunaanni Timersoqatigiit Kattuffianni siulittaasoq Nuka Kleemann Sermitsiaq.AG-mut oqarpoq.
Killilersuutit
Taamaakkaluartoq unammiuaarnerit ingerlanneqarsinnaaleraluartut periarfissamillu ammaassisoqaraluartoq avaqqunneqarsinnaanngilaq ukioq manna allaanerusumik unammiuaarnerit ingerlanneqassammata, kattuffik tusagassiutinut nalunaarummi ilisimatitsivoq.
- COVID-19 suli nunarsuarmi atungaavoq aammalu upalungaarsimaniarneq eqqarsaatigalugu peqqussutit kikkunnit tamanit malinneqassapput. Aaqqissuinerni tamakkiisumik najuullutik peqataasinnaasut amerlassutsitigut killilersuinerit suli atuupput, unammiffiusussanilu timersortarfinni peqataasinnaasut annerpaamik 100- uusinnaatitaammata silaannarmilu pisuni najuullutik peqataasut qaffasinnerpaamik 250- iusinnaatitaallutik.
Aningaasat illikartinneqartut
Unammersuaartitsinissanut ingerlanniakkanut atugassanik aningaasanik qinnuteqartoqarsinnaavoq.
Taakku atorlugit Corona peqqutigalugu pissutsit tunngaviusut allanngornerini ingerlatsillunilu kattuffiit peqatigiiffiillu nukittorsarniarlugit suliniuteqartoqarsinnaalluni, taamaattunummi Kalaallit Nunaanni Timersoqatigiit Kattuffiat aningaasanik qinnutigineqarsinnaasunik immikkoortitsinikuuvoq.
Aningaasat 1,6 million koruunit immikkoortinneqarsimasut ilisimatitsissutigineqarpoq.
Periarfissaq atorluarneqarnissaa Nuka Kleemann innersuussivoq.
- Apriilip 18-ata kingorna aamma unammersuaartitsisoqarsinnaaneranik periarfissanik ujaasisoqarnissaa aamma neriuutigaarput, oqarpoq.
Corona pissutigalugu ukioq kingulleq killilersuisoqarmat unammersuaartitsisoqanngitsoorpoq.