Timersoqatigiit kattuffiat atuarfiit pillugit: Timi atorlugu - aningaasaqarnikkut pillaanani
Kalaallit Nunanni Timersoqatigiit Kattuffiata meeqqat atuarfiat timip atorneratigut nukittorsarniarpaa. Atuarfiit ingerlanerluppata kommunit aningaasaqarnikkut pillarneqartarnissaannik siunnersuut kattuffiup akerlianik iluaqutissartaqarsorinngilaa.
Kalaallit Nunaanni Timersoqatigiit Kattuffiat meeqqat atuarfiata pisariaqartumik kivitseqataaffiginissaanut oqallinnermut peqataarusuppoq. Tamatumunnga atatillugu kattuffik misilittakkanut aamma ilisimatusarnernut innersuussivoq, tassani meeqqat timimik atuitinneqarluartut atuarfimmi ingerlalluarnersusarnerat takutinneqarpoq.
Atuarfiit piumasaqaatinik naammassinninngippata, kommuninut tapiissutit apparsarneqartarnissaat isumaliutersuutigaat. Timersoqatigiit kattuffiata isumassarsiaq tamanna upperivallaanngilaa.
- Meeqqat atuarfiat nukittorsarneqarumaneqarpat angusat ”pitsaanngitsillugit” kommunit aningaaasaliiffigineqarnerat taava apparsarneqartassasoq tusarlugu, aqqutisaqqissuusorinanngilaq, kattuffimmi siulittaasoq Nuka Kleemann oqarpoq.
Akunnerit arfinillit eqaarsaarneq aamma matematikkernermi timip atorneqarnera
Atuarfeqarfiit suliassaqarfippassuartigut unammilligassaqartut taanna isumaqarpoq, tamannalu toraagaqarluni suliniuteqarnernik aamma aningaasaliinernik pisariaqartitsisoq. Aningaasaliinerillu tassaasinnaapput, timip atorneratigut meeqqat ilikkartikkuminarnerulersinnaanerat misissorneqarnissaa.
- Nunarsuarni allani misissukkat takutippaat, timimik atuineq ilikkagaqarsinnaanermut qaffassaataasinnaasartoq aamma meeqqat nukiminnik eqaannerusumik atuisinnaassusiat eqqarsaatigalugu, kiisalu amma uppernarsarneqarluni timimik atuineq inuusaatsit pissutigalugit pualavalaarlunilu nappaateqalersinnaanernut illersuutaasinnaasoq. Aamma uppernarsineqarpoq timimik atuineq ataatsimuulernermik pilersitsisartoq meeqqat allanik peqateqarnerannut allatullu inuulluarnerulernerannut aqqutissiuutaasumik.
- Assersuutissaqqissuuvoq periuseq Svendborgprojektimik taaguuteqartinneqartoq, nunarsuatsinni timimik atuinerunerup meeqqanut inuusuttunullu pingaaruteqarneranik misissuinerit annersaralugulu sivisunerpaamik ingerlanneqartuusoq. Tassani angusat takutippaat sapaatip akunneranut timersortitsinerit akunnernit marlunniit arfinilinnut amerlinerisigut allatullu timimik atuinerulersitsinikkut (soorlu matematikkimik ilinniartitsineq eqqarsaatigalugu) ilikkarsinnaassuseq 68%-it tikillugit qaffattartoq, Saniatigullu klassini pualavallaartut sisamaniit marlunnut appartartut.
- Paasisat eqqarsarnarput aammalumi takussutissat taamatut ittut allat timimik atuinerulernermit kingunerusartut nunatsinni atuarfinni ataasiakkaani takuneqarsinnaapput.
’Nunarsuarmi nunat timimik atuiffiunerpaasarisaat’
- Kalaallit Nunaannilu Timersoqatiit Kattuffianit kaammattuutigiumavarput, meeqqat atuarfiisa ptsanngorsarnissaannik suliniuteqarnermi timimik atuineq alaatsinaatassat ilaattut isigineqassasoq – takusinnaagatsigumi sunniuteqarluartartuusoq, Nuka Kleemann oqarpoq.
Timimik atuinerunerup meeqqat atuarfiannuinnaq iluaqutaanngitsoq aammali inuiaqatigiinni arlalitsigut iluaqutaasoq, taassuma oqaatigaa. Ataatsimut isigalugu timip atorneqartarnera Kalaallit Nunaanni appasilersimavoq, tamannali Timersoqatigiit kattuffiata allanngortinniarpaa.
- Taamaattumillu nunatsinni Timersoqatigiit Kattuffiannit takorluukkatut anguniagaraarput nunatta nunarsuarmi timimik atuiffiunerpaalersinnissaa. Nalunngilarput anguniagaq imaananngitsuusoq, kisianni suut tamaasa atorlugit anguniarusupparput.
Takorluugaq qaninnerulerniarlugu ulluni 14. aamma 15. november ataatsimeersuartitsiniarput, ”Nunarsuarmi nunat timimik atuiffiunerpaasarisaat” qulequtaralugu.