assammik arsarnermi GM
Timersoqatigiiffik pakatsivoq: U18-t GM-ernissaat illoqarfimmut allamut nuutsinneqarpoq
Paamiuneersut Nagtoralik-45 U18-t assammik arsarlutik GM-erneranni aaqqissuisuusussaagaluarput. Assammik arsartartut kattuffiatali unamminissat Sisimiunut nuutsippaat
Timersoqatigiiffik Nagtoralik-45 ukiuni 70-nngortorsiorneranut atatillugu assammik arsarnermi U18-it GM-ernerat ingerlattussaagaluarpaat. GM apriilip pingajuanit arfengat ilanngullugu ingerlanneqartussaagaluarpoq.
Kisianni Assammik arsartartut kattuffiat Nagtoralimmut nalunaarutigineqarpoq GM Sisimiunut nuunneqartoq. U16 GM Sisimiuni ingerlanneqartussami U18-ni arsartussat arlaqarmata pissutaallutik GM nuunneqarluni. U16-it Sisimiuni GM-ernerat marsip 28-anit apriilip aappaat ilanngullugu ingerlanneqassaaq.
Aalajangiineq pakatsissutigineqartoq
Nagtoralik-45-mi siulersuisut taamatut aalajangertoqarnera iluarinngilaat.
- Piareersarnerit sukumiisut maani Paamiuni ingerlatilereernikuugaluarpagut, Nagtoralimmi assammik arsartartut immikkoortortaani siulittaasoq Hermann Møller tusagassiuutinut nalunaaruteqarpoq.
Nagtoralik-45-p GM-ertitsinissaminut qilanaarsimagaluarpoq.
- Illoqarfinnut assigiinngitsunut GM-eriarnerni aningaasarpassuit atortarpavut. Assammik arsarnerup nunatta qeqqata avataani aamma siuarsarneqarnissaa assorsuaq kissaatiginarpoq. Isumaqaavippugut kattuffiup tunuliaqutitit tassalu peqatigiiffiit kissaataat avaqqukkaat, Hermann Møller oqarpoq.
Assammik arsartartut kattuffiata siulersuisui tamanna pillugu ataatsimiissapput sisamanngorpat. Taamaattumik tamanna sioqqullugu pisoq oqaatigaatigineqarsinnaanngikkallarpoq, tamanna Sermitsiaq.AG-mut oqaatigineqarpoq.