Nuuk
Timersoqatigiiffik nutaanik sponsorertaarpoq
B-67-ip inuussutissarsiornermik ingerlatsisut angisuut marluk sponsorissamisut isumaqatigiissuteqarfigai
Nuummi timersoqatigiiffiup B-67-ip Grønlandsbanki aamma Polar Seafood sponsorissamisut isumaqatigiissuteqarfigai, taamatut klubbi Facebookimi paasissutissiivoq.
Ingerlatsiviit marluullutik ukiunut pingasunut isumaqatigiissuteqarput, selskabit supersponsoritut taaneqarlutik.
– B-67-ip tulluusimaarutigaa Grønlandsbanki Poar Seafoodilu sponsorinngorumallutik aalajangersimammata. Klubbip meeqqanik, inuusuttunik, inersimasunik utoqqarnillu arsaannermik futsalernermillu sulineranik nersorinninnertut isigaarput ingerlatsiviit taama tusaamasaatigisut marluk klubbimik tapersersuiumammata, B-67 Facebookimi allappoq.
Sammisaqartitsinerit
Klubbip siulittaasua Christian Laursen Grønlandsbankip nittartagaanut oqarpoq aningaaserivimmik isumaqatigiissut pingaarutilerujussuusoq.
– Grønlandsbanki supersponsoralugu meeqqanik inersimasunillu sammisaqartitsinerpassuaqartarnissatsinnik anguniakkatsinnut aningaasassaqalerpugut. Klubbimi ilaasortanut tamanut unammiuaartitsisassaagut, meeqqanillu allaat U3-tut ukiulinnik sapaatip akunnikkaartumik sungiusartitsisassaagut, siulittaasoq erseqqissaavoq.