Timersoqatigiiffiit assammik arsartartut kattuffianni siulersuisut nutaat
Timersoqatigiiffiit Assammik Arsartartut Kattuffiat ukiumoortumik ataatsimeeqatigiipput.
Gunnar Sørensen aamma Eqalunnguaq Kristiansen Timersoqatigiiffiit Assammik Arsartartut Kattuffianni siulersuisunut ilaasortanngorput.
Kattuffik sinniisunut ukiumoortumik ataatsimiisitsereerluni tusagassiorfinnut taama nalunaaruteqarpoq.
- Gunnar Sørensen dommeritut suliaqartareerpoq nukittorsaanissamullu anguniagaqartuulluni. Gunnar Sisimiuni najugaqarpoq, Sisimiunilu assammik arsarnermik aallussisoqarnerulernissaanik suliaqarluarsinnaalluni. Eqalunnguaq Kristiansen, nunanut allanut unammisartuusimasoq, siorna Norsaq HC-mi maannalu GSS-imi unammisartuusoq suleqatigiinnerup nukittorsarnissaanut sulisinnaavoq nukissaqarluarlunilu, tusagassiorfinnut nalunaarummi allassimavoq.
Marluk tunuarput
Lena Ravn Davidsen aamma Jørgen Isak Olsen siulersuisuni ukiuni arlalinni sulereerlutik tunuarput.
- Taakku nukippassuit atorlugit assammik arsarnermik suliaqarsimapput, suliaannullu qujamasuttorujussuuvugut. Assammik arsarnermik suli aallutaqassapput, oqaloqatigiinnernilu aamma suli siunersiorfigisinnaallugit, allassimavoq.
Ineriartorneq pitsaasoq
Kattuffimmi siulittaasoq Carsten Olsen assammik arsarnerup ineriartornera pitsaasutut iqaatigaa, kikkunnullu tamanut inissaqartitsineq maluginiarsimallugu.
- Assammik arsarnermi teknikkigissaarpugut, iligiilli unammisartut amerlanerulernissaat suli sulissutigisariaqarlugu, oqarpoq.
Iliuuseqarneruniartut
Assammik arsartartut kattuffia kattuffiuvoq angisooq, avannaani Uummannamiit kujammut Qaqortoq tikillugu ilaasortaatitaqartoq. Nunanut allanut unammisartut inersimasut holdit marluusut aamma U20-ni nunanut allanut unammisartut holdit marluk pillugit suliaqarput, sungiusaasut piginnaasaat qaffassarneqartarput pissartanngorniunnerillu ingerlanneqartarlutik.
- Suliat taakku nukittorsarneqassapput, taamatullu sulisussamik allamik nassaarniartariaqarpugut, siulersuisullu iliuuseqarnerusussat ingerlallugit, allassimavoq.
