Inuusuttut Olsen Bandenimi Egon Olsenip tillinniarniarluni pilersaarusiortarnerannit isumassarsitinneqarsimagunarput. Tallimanngornerup ullaassaani aalajangerput Nuuk Centeriup pisiniarfiisa ilaanni aningaasaasivimmik tillinniassallutik.

Politiit Nuuk Centerimi tillinniartoqarsimanera pillugu tallimanngornerup ullaavani paasiniaallutik suliaqarput.

Tillinniartoqarnerani centerimiittumi pisiniarfimmi aningaasaasivik atortullu elektronikkiusut tillinneqarsimapput, pigaartut pisortaat Malik Olesen Sermitsiaq.AG-mut oqaluttuarpoq.

Politiit tallimanngornermu ullaavani paasiniaanerminni angusaqarluarsimapput.

Pigaartut pisortaata oqaatigaa, politiit misissuinerminni pasisaasoq tigusarisimagaat aningaasaasivillu nassaarisimallugu.

Allat pingasut oqaloqatigineqassasut

Pigaartut pisortaata oqaluttuaraa, politiit suliamut atatillugu inunnik pingasunik allanik oqaloqateqarniartut.

- Inuusuttut misissuinitsinni paasisimasagut matumani pineqarput, pigaartut pisortaat maannakkorpiaq suliamut atatillugu oqaaseqarsinnaanngitsoq oqarpoq.

Politiit innuttaasut tillinniartoqarsimaneranik paasissutissaateqarsinnaasut tusarfigerusuppaat.

Pigaartut pisortaata oqaatigaa, politiit tillinniarsimasunik ujaasinerup saniatigut ulloq unnuarlu allanik aamma ulapputeqarsimasut.

Aalakoornartutorsimalluni biilertoq tigusarineqarsimasoq

Sisamanngornerup unnukkuani annaassiniartoqarpoq, tallimanngornerullu ullaavani Nuummi aalakoornartutorsimalluni biilertoq tigusarineqarsimalluni.

Angut aalakoornartutorsimalluni biilertoq illoqarfiup immikkoortortaani Nuussuarmi unitsinneqarsimavoq. Angut tigusarineqarsimavoq aalakoornartutorsimallunilu biilersimasutut unnerluutigineqarluni iperagaangallarsimalluni.

- Aalakoornartutorsimagunartumik biilertoqartoq pillugu naluaaqutaq arfineq qaangilaaraa nalunaarfigineqarpugut. Innuttaasut pasinartumik biilertoqarneranik takunnissimallutik sianertarnerat nuannaarutigaarput, Malik Olesen oqarpoq.