Tillinniat Iphonesinik annissisimasut
Narsami Pilersuisoq tallimanngornerup unnuaani tillinniarfigineqarsimavoq.
Kalaallit Nunaanni Politiit tallimanngornerup unnuaani nalunaaqutaq 03.30 Narsami Pilersuisup pisiniarfiani tillinniartoqarsimasoq pillugu nalunaarfigineqarsimapput.
Pigaartut pisortaata Malik Olesenip oqaluttuaraa, pisiniarfimmi sorpianik tillittoqarsimanersoq suli erseqqissumik paasineqanngitsoq, Iphonesilli arlallit amigaatigineqartut paasineqarsimasoq.
Politiit suliamut atatillugu misissuipput, ilaatigullu pisiniarfimmi nakkutilliissutitut filmiliuut misissorsimallugu, pigaartullu pisortaata oqaatigaa, tillinniarsimasut inuussuttuusut takuneqarsinnaasoq.
- Kikkuunersut suli ilisimanngilarput, misissuinerpulli ingerlatiinnarparput, pigaartut pisortaat oqarpoq.
Innuttaasut tillinniartoqarsimaneranik ilisimasallit kaammattorneqarput politiinut 70 14 48-mut sianerlutik saaffiginneqqullugit.