Tillinniartut: Imigassat sikaritsillu tillinneqarsimasut

Nuummi Qinngorpumi Pisiffik sapaatip ullaassaani tillinniarfigineqarpoq. Tillinniartuni sisamaasuni pingasut 18-it ataallugit ukioqarput, 18-ileereersimasorli suli tigummigallarneqarluni.

Inuit sisamat Qinngorpumi Pisiffimmi sapaatip ullaassaani tillinniarput. Tillinniartut pingaarnertut imigassat aalakoornartortallit sikaritsillu tillissimagaat, Kalaallit Nunaata Politiivini pigaartut pisortaat, Søren Bendtsen Sermtsiaq.AG-mut oqaluttuarpoq.

- Tillinniartuni sisamaasuni pingasut 18-it ataallugit ukioqarput, taakkunanilu ataaseq 15-it ataallugit ukioqarluni. Taakku tigusarineqarnermi killisiorneqarput, unnerluutigineqarput iperagaallutillu. Sisamaat 18-it sinnerlugit ukioqarpoq, taannalu suli tigusarineqaqqavoq, oqaluttuarpoq.

Tillinniartoqareernerani politiit sulinerminni malittarisinnaasaminnik nassaarput, tillinniarsimasutullu pasisat sisamaasut pilertortumik nassaaralugit.

Søren Bendtsen oqaluttuarpoq tillitat politiit maanna tigummigaat.

Suliaq misissuiffigineqarpoq

Tillinniartutut pasisat politiinit annerusumik minnerusumilluunniit ilisimaneqareerput.

- Suliaq suli misissorparput. Sulianullu allanut paasineqarsimanngitsunut sanilliullugu, assigiiffeqarnersut paasiniarlugit. Inuusuttut sisamat inuunermik aqqutissamittut toqqangaat imaannaanngilaq, pingaartumik taama inuusutsigineri eqqarsaatigalugit, Søren Bendtsen oqarpoq.

Tillinniartuni inersimasuusup piffissami sivisunerusumi tigummigallarneqarnissaa pillugu inatsisitigut naliliisoqassasoq ilisimatitsissutigineqarpoq.

- Nalilersugassanut ilaassaaq pineqartoq assigusunik pinerlussimanersoq, aamma uteqqiattumik pinerluuteqartarnersoq kiisalu pineqaatissinneqareernerup kingorna piffissap sivikitsup ingerlanerani pinerloqqissimanersoq.

- Soorunami aamma nalilersussavarput siunissami assingusumik pinerloqqinnissaanut ilimanaat aamma pinerluttulerinermi avatangiisiminut mianernarnersoq, Søren Bendtsen oqarpoq.

Tillinniartoqarsimanerup saniatigut imigassartortoqarsimatillugu suliassanik arlalinnik politiit sapaatip unnuaani suliaqarsimapput.

Powered by Labrador CMS