Tillie: Nunarput internetikkut isumannaallisaanermut malinnaasimanngilaq
Kalaallit Nunaanni internetikkut isumannaallisaanermi malunnaatilimmik pitsanngorsaasoqarnissaanik Suleqatigiissitsisut piumasaqarput - Danmark qanimut suleqatigalugu.
Kalaallit Nunaanni internetikkut isumannaallisaanermi malunnaatilimmik pitsanngorsaasoqarnissaanik Suleqatigiissitsisut piumasaqarput. Tamannalu Danmark qanimut suleqatigalugu pissaaq.
- Kalaallit Nunaat nunanut allanut attaveqarpoq, sakkutooqarpoq, ileqarpoq aamma allanik iluaqutissarsivigineqarsinnaasunik peqarpoq Danmark Naalagaaffeqatigigallartillugu aamma Suleqatigiissitsisut isumaat naapertorlugu Danmark suli annerusumik suleqatigisariaqarparput nunanut allanut tunngasut pillugit, piviusorsiortumik aamma silatuumik, partiip Inatsisartunut ilaasortaatitaa, Tillie Martinussen bloggimi ilanngussamini taama allaaserisaqarpoq.
- Big bucks
Aatsitassat qaqutugioortut Kalaallit Nunaat pissaanilissuarnut soqutiginarnerulersissinnaagaa taassuma aamma oqaatigaa. Ingammik nunarsuup sinnerani nungukkiartulerneranni.
- Aamma Kalaallit Nunaat nunarsuarmi soqutiginartumik inissisimavoq, avannaarsuani imaatigut angallanneq eqqarsaatigalugu, nunarsuarmi umiarsuaatileqatigiiffinni big, big bucksimik nassataqarsinnaasoq. Kalaallit Nunaat silaannarmi qaartartorniutit rakittit ingeriuttakkat atorlugit illersornissamut ilaavoq, nunarsuarmi iligut suleqatigalugit aamma pinngitsoortinniarlugu nunanit tatiginarpallaanngitsunit tiguarneqarsinnaaneq. Geopolitik niuerfissuuvoq, illersornissaq eqqarsaatigalugu aamma nunanut allanut politikki eqqarsaatigalugu nunarput inissisimavoq pingaarutilissuarmik, taamaattumik peqataarusussanngikkaluarutta tusaaneqarnavianngilagut, Tillie Martinussen nangilluni allappoq.
Kina aamma inuit pisinnaatitaaffii googlikkit
Suleqatigiissitsisuni politikerip internetikkut akornusiiniartarnerit takussaasut kisiisa tikkuartunngilaa, ingammik Kinap naalagaaffiata attaveqaqatigiinnernut inuiaqatigiinnut pingaarutilinni pisiaqarnermikkut nunap ineriartorneranut sunniuteqarsinnaanera aamma oqaatigaa.
- Sooq ajornartorsiutaassava? Atagu uku oqaatsit googlikkit "Kina, inuit pisinnaatitaaffiit, akerliuneq aamm naalakkersuisut", ujaasinerpillu inerneri atuarelugit. Kina ilisarisimaneqarpoq isumaqatigiissutinik unioqqutitsisartutut aamma naliginnaavoq unammilleqatigiinnernik paasissutissanillu nakkutiginnittarnera, inunnik naalliuttisisartutut aamma inuit pisinnaatitaaffiinut unioqqutitsisartutut.
- Naalagaaffeqatigiinni piginnaasaqarluartoqarnera atorlugu aamma suleqatigiilluarnikkut suliffeqarfiit ulorianartorsiortitsilernavianngitsut isumaqatigiissuteqarfigisinnaagaluarpagut - soorunami Kinami nunarsuullu sinnerani suliffiit tamarmik ulorinartuunngillat pasinartuunatillu. Ajornartorsiutaaginnarpoq ajortunik akoqarmata aammalu ilisimannginnatsigu sorliit ajortuunersut.
Matumani Naalakkersuisut systemimik kinamiut aamma nunat allat suliffeqarfiutaannik, ilaatigut umiarsualivinnut, mittarfinnut aamma nalunaarasuartaateqarfinnut pisiniarniartunik nakkutilliisussamik suliaqarlutik aallartisalaalereerput. Danmarkimi aamma EU-mi nunat allat inatsimmik suliaqaleruttorput, taassuma attaveqaatini pingaarutilinni nunani allani aningaasaliisartut misissugarissavai. Kalaallit Nunaanni systemimik assingusumik periarfissaqarnersoq misissuisussanik, kalaallit qallunaallu suleqatigiissitat pilersinneqarsimapput.
Internetikkut isumannaallisaanermut tunngatillugu Danmarkimut qaninnerusoqartariaqartoq, Tillie Martinussen aamma isumaqarpoq.
- Isertortumik paasiniaasartoqarnikkut aamma qarasaasiap silarsuaani suleqatigiinnikkut, danskit ineriartortitsiniarlutik suliniutaannut akiliilluta ilannguttariaqaraluarpugut - immitsinnut sorsuakkiariunnaarluta eqqarsarluta nammineq aqqiissutissanik ineriartortitsisinnaalluta.
- Danmark Kalaallit Nunaallu qarasaasiap silarsuaa eqqarsaatigalugu sinngussimapput, taamaakkaluartorli immikkoortumik nukittuumik pilersitsisinnaavugut paarlaateqatigiittarlutalu paasissutissanik, ulorinartorsiortinneqarnernut tunngasunik kiisalu periutsinik innuttaasut illersorniarlugit, politikkikkut aamma ilisimatusarnikkut kiisalu allatigut suliniutitigut iluaqusiisinnaasutigut.
- Qarasaasiap silarsuaani ulorinartorsiortinneqarnerup ulorianartortaraa aggertarmata nunarsuami suminngaanniilluunniit tassanerpiarlumi silarsuaq ataqatigiippoq piumagutta piumanngikkaluaruttaluunniit.