Tillie: Kim atorfiit isumaginiaruk

Naalakkersuisut siulittaasuat Kim Kielsen (S) aamma attaveqaqatigiinnermut ineqarnermullu naalakkersuisoq, Karl Frederik Danielsen (S), aningaasaqarnermut akileraartarnermullu ataatsimiititaliamut isumasioqatigiinnissamut aggersarneqarput.

Nuummi aamma Ilulissani mittarfiliornissat pillugit Munk Gruppemut isumaqatigiissutip Kalaallit Airportsimit atsiorneqannginnerini, mittarfiliortiternermut suliniutini aningaasaqarneq pillugu ersarinnerusumik nassuiaasussaagaluarput. Kisianni Karl Frederik Danielsen kisimi aggerpoq. Aalajangerneq tamanna Suleqatigiissitsisuneersumit Tillie Martinussenimit akuersaarneqanngilluinnarpoq.

- Naalakkersuisut Siulittaasuannut isumaqasioqatiserineqarnini ilassinngilaa taamaasillunilu atorfini sumiginnarlugu, tamanna Suleqatigiissitsisuni atorfimmik paarsilluannginnertut, pimoorussunnginnertut kanngunartutullu isigaarput, taanna tusagassiuutinut nalunaarummi taama oqarpoq.

Akissaqartinneqartariaqartoq

Mittarfiliortiterneq nunamut annertuumik sunniuteqartussaammat, Inatsisartut tamakkiisumik ilisimatinneqartariaqartut, Tillie Martinussen isumaqarpoq.

- Politikkikkut aalajangerneq Kalaallit Nunaanni sunut tamanut kikkunnullu tamanut kinguneqartussaavoq.

- Taamaattumik suliassarsuarnut tunngatillugu akisussaasutut pisussaaffeqarnermik misigisisimanissamut pisariaqartitsipput.

- Akissaqartinneqartariaqarput aamma kalaallit inuiaqatigiit sanaartornerup ingerlanerani kingornalu ingerlasinnaasariaqarput. Taamaattumik Inatsisartut sualummillu Aningaasaqarnermut Ataatsimiititaliaq paasissutissanik tamakkiisunik tunineqartariaqarpoq taamattumik aamma Naalakkersuisoq kinaagaluartorluunniit isumasioqatiserineqaraangami orniguttartussaavoq.

Inuttut akisussaaffik

Paasissutissat ataatsimiititaliamut saqqummiunneqanngimmata, arlaatigut ajutoortoqassappat Naalakkersuisunut ilaasortat inuttut akisussaatinneqartariaqartut, Tillie Martinussen isumaqarpoq.

Pilersaarut naatsorsuutigineqartunut naleqqiullugu 1 koruuninik, 1 million koruuninik imaluunniit 999 millioner koruuninik akisunerussavara, taamaassimappat Naalakkersuisuni ilaasortat aningaasaliissutit pillugit naatsorsuutinut ataasiakkaarlutik akisussaatinneqartariaqarput. Aningaasat inuiaqatigiit aningaasaatigaat aamma aningaasat inuiaqatigiinnut atorsimasinnaagaluarpaat, kiffartuussinerit akiisa appartinnissaannut atorsimasinnaagaluarpaat aamma tungiuinerup pitsaanerulersinnissaanut.

Suliaq pineqartoq ingasammat, Kim Kielsenip Naalakkersuisunut siulittaasutut soraarsinneqarneranik kinguneqartariaqartoq, taanna isumaqarpoq.