Tillie: Huawei pillugu paatsoornartumik nalunaarneq
Naalakkersuisut attaveqatigiinnermi Huaweimik atuinnginnertik pillugu nalunaarnerat Suleqatigiissitsisunit eqqumiigineqarpoq.
Naalakkersuisut Huawei pillugu nalunaarnerat Tillie Martinussenip (Sul) maluginiarpaa.
Nittartakkamik atuinermi sillimaniarneq pillugu naalakkersuisoq Ane Lone Bagger (S) ima allappoq ‘Attaveqatigiinnermi Huawei atunngilarput’.
Tamanna pillugu Tillie Martinussen (Sul) §37 atorlugu ima apeqquteqarpoq:
- Naalakkersuisut siusinnerusukkut Huaweimik immami kabelip suliarineqaneranut atatillugu suleqateqarsimanertik – kiisalu modemit Huaweimeersut Kalaallit Nunaanni atorneqartut pillugit isumakulunnartoqartinngilaat?
Suleqatigiissitsisut Inatsisartuni ilaasortaatitaata tunngavilersuummini allappaa Naalakkersuisut nersualaarusullugit nittartakkanik atuinermi sillimaniarnerunissaq pillugu Danmarkimut Isertortumillu paasiniaasartunut PET-imut FET-mullu qaninnerusumik suleqateqalersimanerat pillugu.
- Taamaattorli tupigusuutigaarput, uagut attaveqaqatigiissutitsinni Huaweimik atuinngitsugut oqaatigineqarmat, tamannalu sangutitsineruvoq. Huaweimik atortut sillimaniarnermut ulorianartorsiortitseratarsinnaanerat oqaatsimik ataasinnguamilluunniit taaneqanngillat. Tamanna Naalakkersuisut namminneerlutik inuiaqatigiinnut nassuiaatigisariaqarpaat, kiisalu nunap aqutsisuinut – kisianni Huaweip atorneqannginnerarneranik oqarneq tupigusuutigaarput. Taamaassoreqqissaarparpummi. Taamaattumik apeqqutit ukua qulaajaassutaassapput, allassimavoq.
Kinamiut attaveqarnermut atortorisai Huaweimeersut nunani arlalinni piffissami kingullermi isumakulutsitsivoq, isumakulunnermut pissutaavoq ingerlatseqatigiiffiup naalagaaffimmut qaninnerujussua taamatullu kilitsissiatut sulisutut pasineqarnera. Pingaartumik Huaweip nunani arlalinni, taakkununnga ilaalluni Danmarkimi, attaveqarnikkut atortumik sukkanerusumik, 5G-jusumik, sanaartuinera ernumatitsivoq.
Tamassuma saniatigut Tillie Martinussenip paaserusuppai Naalakkersuisut PET aamma FET suleqatigalugit Kalaallit Nunaanni sillimaniarnikkut putut ataatsimut qanoq isikkoqarnersut pillugit, sillimaniarnikkut ulorianartorsiutaasinnaasut nalunaarasuartaateqarnermut tunngassuteqartut pillugit kiisalu nunap peratarsinnaasunut nalilersornera, minnerunngitsumillu Inatsisartut Naalakkersuisullu attaveqaqatigiinnermi, nalunaarasuartaateqarnermi internetikkullu sillimaniarnermi qanoq inissisimanerat.