Tillie: Benziinamut akiliummik atornerluisoqarsimava?
Naalakkersuisup benziinamut akiliutini, Namminersorlutik Oqartussanit tunniunneqartoq atornerlukkaa, Suleqatigiissitsisuneersoq Tillie Martinussen naapertorlugu tusatsiakkanik tusarsaasoqarpoq.
Tillie Martinussen isertortumik saaffiginnissuteqartoqarnera naapertorlugu paragraf 37 naapertorlugu apeqquteqaammik nassiussaqarpoq.
Angallammut benziina
- Suleqatigiissitsisuni nalunngilarput oqallisaasoq Naalakkersuisup ataatsip naalakkersuisutut akiliunni atornerlullugu angallatini orsersorsimagaa, suliaq pillugu paragraf 37 naapertorlugu apeqqummut tunngavilersuut taamaappoq.
- Akiliut naalakkersuisutut biilimik orsernermi atugassatut tunniunneqarsimavoq, akuerisaalluni ministerit/ Naalakkersuisut atortagassaattut, malunnarlunili atorneqartarsimasoq allanik orsersuinermut, allagartat uppernarsaatit naapertorlugit benzina biilit imarisinnaasaat sinnerujussuarlugu pisisoqartarsimammat, Suleqatigiissitsisut Inatsisartunut ilaasortatuaat allappoq.
Tusatsiakkat ajortisaariniutit?
- Uanili pineqartumi apeqqutaavoq, ajortitsiniarluni oqallisiginnittoqarsimanersoq imaluunniit pineqartoq uppernarsaatissaqarnersoq. Oqallisiginninneq kusanaattupilussuuvoq taamaattumik kusanaatsumik oqallisiginninneq unitsikkusupparput pineqartoq eqqunngippat. Nunatta pisariaqartippai siuttut unneqqarissut inatsinillu ataqqinnittut taamaattumik aamma pinngitsuunerat uppernarsartariaqarpoq oqallisigineqartoq tunngavissaqanngippat.
Apeqqutit ullut qulit suliffiusut qaangiutsinnagit akissuteqarigineqarnissani naatsorsuutigaa.