oqaatsit oqallisigalugit

Tillie: Tuluttoorneq utaqqisilli

Qallunaatoortarneq tuluttoornermik taarserneqarnissaanut oqallinnermi isumaliorpalaartoqarnissaanut Demokraatineersoq Tillie Martinussen oqaaqqissaarivoq. Oqallinneq misigissustsinik aallaveqarpallaarsoraa

Oqaatsit oqallisigineqaraangata misigissutsinik aallaaveqartarput. Demokraatit Inatsisartunut ilaasortaatitaat, Tillie Martinussen, taama oqarpoq. Qallunaatoortarneq tuluttuumik taarserneqarnissaanut siunnersuummi tamanna kingullermik pisoq, taanna isumaqarpoq.

- Oqallinnermi nipi atorneqartoq kamaammiutiginngitsoorsinnaanngilara, taanna oqarpoq.

Atuaruk: Qallunaat oqaasii atorneqarpallaarunnaassapput

Tillie Martinussenip Naalakkersuisut tuluttut allamiut oqaasianni siullinngortinneqarnissaanut siunnersuutaannut tunngatillugu oqallinneq tassani eqqarsaatigaa.

Oqallinnermi siunnersuummik tapersersuisut akerliusut killissamik qaangiisut taanna isumaqarpoq.

- Meerartatsinnut maligassiuisussaavugut, taamaattumik asissuilluta oqallinneq taamaatittariaqarparput, taanna oqarpoq.

Atuaruk: Siumup inuusuttai: Qallunaat oqaasiisa akimmisaarpaatigut

Nivi Olsenip pilersaarutaa qularaa
Taassuma saniatigut Tillie Martinussenip parteeqatimi Nivi Olsenip pilersaarutaa qularaa, tassa meeqqat atuarfiani atuartut qallunaatut ilinnialinnginnerminni tuluttut ilinniarlertarnissaat. Ilinniartitaanermut naalakkersuisup ukiut marluk ingerlanerini tamanna piviusunngorsinnaasoq upperaa.

- Tamanna upperinngilara, tamannalu isumassarsiatsialaasorinngilara, Tillie Martinussen oqarpoq.

Atuarfiit ilaanni annertuumik ajornartorsiortoqartoq taanna isumaqarpoq, taakkulu nutaanik iliuuseqartoqannginnerani iluarseqqaartariaqarsorai.

- Meerartagut inuusuttagullu kalaallisut ilinniartissinnaanngilagulluunniit allat allamiut oqaasiinik qaffasissumik ilinniarsinnaalersillugit, aamma pinngitsoorata mianersuutigisariaqarparput illoqarfinni nunaqarfinnilu atuarfiit assigiinngippallaalernissaat, tamannami siunertaanngisaannarmat, taanna isumaqarpoq.

Tuluttut qallunaatullu assigiimmik pingaassusillik
Tunngaviusumik tuluttut pingaarnerulersinneqarnissaa pitsaasutut isigaa. Kisianni qallunaatoornermut taarsiutitut atorneqassanngitsoq isumaqarpoq.

- Nunani Avannarlerni tamani ilinniarfinnut qallunaat oqaasiisa ammaappaatigut. Tuluttoorneq piffissami nunarsuarmioqataaffiusumi pingaaruteqarpoq. Oqaatsit naligiisinneqartariaqartut isumaqarpunga, taanna oqarpoq.

Meeqqat atuarfianni tuluttoorneq pingaarnerulissappat annertuumik pitsanngorsaasoqartariaqartorli isumaqarpoq. Ukiut marluk sinnerujussuarlugit tamanna sivisussuseqassasoq ilimagaa.

Powered by Labrador CMS