Tillie mittarfiit pillugit: Toqqortikkat saqqummeralerput
Kalaallit Nunaat pingasunik akisuunik aserfallatsaaliorneqartussanik atlantiku qulaallugu mittarfeqalersinnaanera, Suleqatigiissitsisuneersup Tillie Martinussenip silaqanngitsuliornerarpaa.
Danskit aamma amerikamiut illersornissaqarfiisa Kangerlussuarmi mittarfik pisariaqartikkaat, ministeriunerup Lars Løkke Rasmussenip KNR-imut ilisimatitsissutiginikuuaa. Silap allanngujuinneranik tamanna ilaatigut tunngavilersorneqarpoq. Ilulissani imaluunniit Nuummi mittarfiup nutaap Kangerlussuup pingaaruteqassusaa taarsersinnaanngikkaa, ministeriuneq isumaqarpoq.
Danskit ministeriunerata taama oqariartuuteqarnera, Tillie Martinussen Suleqatigiissitsisuneersoq, allagaqartippaa.
- Suleqatigiissitsisuni isornarluinnaqqissaartutut isigaarput mittarfiliortiternissat akuerineqariillartullu ajorsinnaasut puttussuutilermata, Tillie Martinussen, paragraf 37 naapertorlugu Naalakkersuisunut apeqquteqarnermini tunngavilersuummini taa,a allappoq.
- Kangerlussuup matuneqarneratigut mittarfiliortitsinissat akilersinnaanerulernissaanut tunngavilersuutinut ilaammat uagutsinnut eqqumiippoq, Tillie Martinussen uparuaavoq.
Iluarsartuunneqarnissamut pisariaqartitsisorujussuaq
Mittarfiliortiternissamut pilersaarut akuerineqannginnerani misissuinernit saqqummerpoq, Kangerlussuarmi mittarfik Atlantiku qulaallugu mittarfiuinnassaguni milliardit affaannik nalilimmik iluarsartuunneqarnissamut pisariaqartitsisoq.
Mittarfiliortiternissamut pilersaarutip aalajangiunneqarnerata allanngortinneqarnissaa akikinnerujussuunissaanik, tamatuma Tillie Martinussen oqaaseqartippaa.
Nunap mittarfik ingerlatissappagu, Kangerlussuaq aningaasaqarnikkut Kalaallit Nunaannut qanoq sunniuteqassanersoq, taassuma ilaatigut akissutissarserusuppaa.
- Naalakkersuisut qanoq iliorlutik illersorsinnaavaat Kangerlussuarmi, Nuumi Ilulissanilu mittarfiit allinissaat aserfallattaalinissaallu pissutsit piulersut aallaavigalugit? Aamma aningaasarparpassuarnik taarsigassarsisariaqarnissaq eqqarsaatigalugu?