Tillie aningaasanut inatsit pillugu: Atorsinnaanngilaq
Partii Suleqatigiissitsisut isumaqarput, qulequttat arlallit aningaasanut inatsisissatut siunnersuummi aningaasaliiffigineqarsimanngitsut. Taamaammat aningaasartuutit amerliartuinnarnissaat partiip ernumassutigaa.
Tillie Martinussen Suleqatigiissitsisuninngaanneersup aningaasanut inatsisissatut siunnersuut piviusorsiortuunnginnerarpaa.
Naqqani kisitsisit kusanartutut isikkoqaraluarput, Suleqatigiissitsisullu Inatsisartuni ilaasortaatitaat naapertorlugu aningaasartuutit arlallit isiginiarneqarsimanngillat.
- Tassa imaappoq Aningaasanut inatsisissaq ataatsimiinnissami aggersumi ajorseriaqqissaaq taamaasillunilu
piviusorsiunngilluinnarluni, taanna tusagassiuutinut nalunaarummi allappoq.
- Kannguttaatsuliortoqartarnerata akiorneqarnissaanut aningaasat ikippillaarput
- Malunngitsuugassanngilaq suunngitsuaqqamik iluarsartuussiniartoqarmat. Soqanngilaq eqqarsaatigalugit
ineqarnermut tapit ingerlanerluttut nutarternissaat, akileraartarnermut iluarsartuussinissaq, ilinniartaanerup iluarsartuunnissaa imaluunniit kolligiat nutaat atorfissaqartinneqartut
pingaarnerutinneqarsimanngillat aamma inissiat aserfallalluinnartut aamma atuarfiit oqunnik ulikkaartut qissiminneqarpiarsimanngillat.
- Angajoqqaarsiat allallut meerartatsinnik inuusuttatsinnillu isumassuisut sunneqarsimanngillat aamma
iliuuseqarasuartarnissat pinaveersaartitsinerillu Aningaasanut Inatsimmi takusassaarpianngillat.
- Meeqqeriviliornissanut, perorsaasunik amingaatigineqartunik atorfinitsitsinissamut suamik aningaasaliisoqarpoq aamma sunnguamilluunniit eqqaaneqanngilaq qanoq iliorluni inuit
ilinnialersinneqassanersut imaluunniit siunissami sunik suliffissaqassanersut, Tillie Martinussenip ujartugaasa ilaat taakkuupput.
Aammattaaq isumaqarpoq, kannguttaatsuliortoqartarnerata akiorneqarnissaanut 4 millioner koruunit immikkoortinneqarsimasut naammaqqajanngitsut, immaqa aningaasat atorlugit qaammarsaasoqallatsiarsinnaavoq pinaveersaartitsisoqaminerlunilu.
- Naalagaaffinngornissamut ataatsimiititaliaq, aningaasanik asuli atuisoq aamma piffissarititaasumik sippuisimasoq akilerneqarpoq innuttaasulli ajornartorsiutaat piviusut akiugassaallu
isiginngitsuusaarneqarput.
Tamannalu tunngavigalugu taanna atorsinnaannginnerarpaa.