Tilioq: Tarnikkut nakuuserneq pinerlunnertut inissittariaqarpoq

Nakkarsaanerit, pimmatiginninnerit, kanngusutsitsiniaanerit akinaveersaarinninnerillu uteqqiattut meeqqat inersimasullu innarluutillit ulluinnarni misigikkajuppaat. Taama isiornerit tarnikkut persuttaanerupput, Danmarkilu assigalugu pinerluutitut isigineqalertariaqarlutik.

Inuit innarluutillit illersuisuata, Anja Hynne Nielsenip tamanna tusagassiorfinnut nalunaaruteqarluni naqissuserpaa.

Danmarkip tarnikkut persuttaasarnerup pillaatigineqartalernissaa 2019-imi atuutsilerpaa. Tamanna malillugu nunatsinni pinerluttulerinermut inatsit allanngortinneqassanersoq pillugu Inatsisartut marlunngornermi 2. maj ataatsimiinnerminni oqaluuserisaqassapput.

- Meeqqat tarnikkut nakuuserfigineqarsimasut akorngini amerlaqisut imminut toqunnissamik eqqarsaateqartarlutillu imminut toqoriartoqartarpoq. Kingunipiluutaasinnaasut aamma ilagaat taaqqunganeq annilaanganerlu, ilassarsiunnginneq, peqqinnanngitsumik nereriaaseqarneq imaluunniit isumaliorulussinnaanikkut pissutsikkullu ajornartorsiuteqalernerit, inuit innarluuteqartut illersuisuat Anja Hynne Nielsen tusagassiorfinnut nalunaaruteqarluni allappoq.

Taanna isumaqarpoq tarnikkut persuttaasarneq pineqaatissiissutaasalertariaqartoq, soorlu timikkut persuttaasarneq taama ittoq.

Sakkortuunik kinguneqarsinnaasoq

Meeqqat pisinnaatitaaffii pillugit sullissivik MIO tarnikkut persuttaasarnerup inuiaqatigiinnilu aqutsinerup pinerluutinngortinnissaanik ukiuni arlalinni suliaqareersoq, Tilioq maanna tapersiilluni nalunaaruteqarpoq. Inatsisartulli oqaluuserinnilerpata inuiaqatigiinni aqutsineq pillugu paragrafeqartoqarnissaa, Tiliup aamma erseqqissarpaa.

- Inuiaqatigiit sorpassuartigut aqutsiniutaasutut killinersuinertalimmik ingerlanneqartillugit, ingammik innarluutillit taakkualu qanigisaat ikioqquneri tusaaneqanngitsoortarput. Inoqatinik aqutsiniarluni tarnikkut nakuusernerup sunniutipilui ilanngullugit pinerluutitut isigineqalerpata tamanna ilorraap tungaanut alloriarnerujussuussaaq, Anja Hynne Nielsen oqarpoq.

Misissuinerit takutippaat tarnikkut persuttarneqarnermi inuup imminut upperinera pissutsinillu iluameersumik takunnissinnaanera sunnerneqartartoq, taamatullu PTSD-mik kingunerluuteqartoqarsinnaasoq.

- Tarnikkut nakuuserneq ulorianartuuvoq unitsikkuminaattuugami kiisalu sunniutai arriitsumik erseriartuaartarmata ajoqutaarujussuarsinnaallutillu. Taamaammat tamanna meeqqamut inummulluunniit pineqartumut annertuumik
sunniuteqarnerluttarpoq, oqarpoq.

Arnat meeqqallu aarlerinartorsiornerusut

Inoqutigiit akornanni tarnikkut persuttaasarneq pisartoq misissuinerit takutissimavaat. Inatsisartut 2022-mi aalajangerput nunarput Istanbulimi isumaqatigiissummut, tassa arnat persuttarneqartarneranut akiuiniarnermut ilanngutissasoq.

Tiliup erseqqissarpaa inoqutigiit kisimik pineqassanngitsut, aammali inuit innarluuteqartut angerlarsimaffiini attaveqatigiittarnerit immikkut maluginiarneqartariaqartut.

- Tarnikkut nakuusertoqartillugu tamatuma arlaleriarluni pisarsimanissaa ilimagineqarsinnaavoq, tarnikkut imminullu ikiornissamut piginnaasatigut innarluuteqarlutik qajassuuttariallit. Nakuuserfigineqarnissaminnut ulorianartorsiornerusarlutillu, ikiorserneqanngitsoortarlutillu taperserneqanngitsoortarput, Tilioq allappoq.

Saaffiginniffissat qulakkeerneqartariaqartut

Inatsisartut aalajangigassamut akuersissappata paasissutissanik suliaqarnissaq, saaffiginniffissanillu ersarissunik peqarnissaq, Tiliup pisariaqartutut isigaa.

- Arnat meeqqallu innarluutillit immikkut qajannartuunerisa paasissutissiissutigineqarnissaat qulakkeerneqartariaqarpoq, kiisalu timikkut tarnikkulluunniit innarluuteqarneq apeqqutaatinnagit saaffiginniffissaqartariaqarput. Assersuutigalugu Nunatsinni qimarnguiit politiillu ilisimasariaqarpaat, immikkut ilisimasariaqakkat sumi nassaarisinnaanerlugit, Anja Hynne Nielsen oqarpoq.

Inatsisartut sammisaq aqagu siullermeerlugu ataatsimiissutigissavaat, aappassaaneerneqassallunilu 23. maj.