Tilioq: Suliallit kattunneqarnissaat sipaarniarnerinnaavoq
Innarluutillit illersuisoqarfiannit suliniaqatigiiffiit tallimat aamma inuit pisinnaatitaaffii pillugit siunnersuisoqatigiit kattunneqarnissaannik Naalakkersuisut aalajangiisimanerat naammagineqanngilaq, Christina Johnsen oqarpoq.
Naalakkersuisut tallimanngornermi decembarip 18-iani tusagassiortunik katersortitsinerminni, Kalaallit Nunaanni illersuisut tamaasa inuillu pisinnaatitaaffiinut siunnersuisoqatigiit kattunneqarnissaat pillugu inatsisissatut siunnersuut saqqummiuppaat. Inatsisissatut siunnersuut 2021-mi februaarip aallaqqaataata tungaanut maanna tusarniaassutigineqarpoq, naatsorsuutigineqarporlu siunnersuut Inatsisartut aappaagu ukiakkut ataatsimiinneranni saqqummiunneqassasoq.
- Sipaarniarnerinnaavoq, inuillu pisinnaatitaaffiinik pitsanngorsaaniarnerunani, Christina Johnsen tusagassiorfinnut nalunaaruteqarnermini oqarpoq.
Inuit pisinnaatitaaffii pillugit Isumalioqatigiissitassaq pillugu saqqummiussinermi oqaatigineqarpoq, meeqqanut, inunnut innarluutilinnut utoqqarnullu maanna illersuisuusut kiisalu Kalaallit Nunaanni inuit pisinnaatitaaffiinut siunnersuisoqatigiit isumalioqatigiissitami nutaami ilaasortatut ingerlaannassasut, Tamatuma kingorna ukiut sisamakkaarlugit ilaasortassanik nutaanik toqqaasoqartassaaq.
Kommissionip Inuit Pisinnaatitaaffiinut Instituti - Danmarks Nationale Menneskerettighedsinstitution suleqatigissavaat.
Robin Hooditut pissusilersortut
Kommisioni Kalaallit Nunaanni inuit pisinnaatitaaffiinik nukittorsaassassaaq, tassungalu atatillugu 12 millioner koruuninik immikkoortitsisoqarsimavoq.
- Naalakkersuisut Robin Hooditut pissusilersorput, tassa siunnersuummi Tiliumut Miomullu aningaasaliissutigineqartartut Kommissionissami ilaasortassanut allanut avinneqartussanngorput. Imaassinnaasoq taamatut isornartorsiuininni assigiimmik pisussaaffeqateqarusunngitsutut nipeqartunga, suliffeqarfittalu maanna killiffia anguniarlugu ilungersorsimaqaagut, maannalu inatsisit malillugit suliassagut naammassisinnaalersimavagut, Christina Johnsen oqarpoq, nangillunilu:
- Nunani allani inuit pisinnaatitaaffii pillugit kattuffinnit Kalaallit Nunaat nersorneqartarpoq illersuisunik pilersitsisimammata, qanorlu inatsisit suliarineqarsimanersut apeqqutigisarpaat. Savalimmiormiut arlaleriarlutik saaffigisareerpaatigut suliavut paasiniaaffigalugit, Inuit innarluutillit illersuisuat Christina Johnsen oqarpoq.
Nalunaarusiortoqarani nalunaaruteqartoqartassasoq
MIO aamma Tilioq ukiuni kingullerni angalasarnernit misissuisarnernillu nalunaarusiaminnik arlaleriarlutik saqqummiussisarput. Nalunaarusiani tamani arlalinnik inassuteqaateqartoqartarsimavoq, soorlu aamma nunami inuit atugaat pillugit inuit namminneq oqaluttuaat ilaatinneqartartut.
- Kommissionimiit inuit pillugit sulianik oqaaseqartoqarsinnaassanngilaq soorlu oqartussanut imaluunniit tusagassiorfinnut, taamaasilluni nalunaarusiani inuit innarluutillit aallaavigalugit allaaserinnittoqarsinnaasassanani. Illersuisutut suliassanik sanngiillisitsineruvoq aamma inuit innarluutillit atukkatik pillugit oqariartuuteqarsinnaanerannut kiffaanngissusaannik ajorseriartitsinerussaaq, inuit innarluutillit illersuisuat oqarpoq.
Siunnersuut naapertorlugu kommissioni ukiumoortumik iliuusissatut pilersaarummik missingersuutinillu saqqummiussisassaaq. Saqqummiussami takuneqarsinnaasassaaq kommissionimi siulittaasoq pilersaarummut missingersuutinullu isumaqataanersoq. Tamatumunnga peqatigitillugu kommisionip suliaqarnera pillugu kommissioni ukiumoortumik nalunaaruteqartassaaq.