Tilioq: Kangerlussuup mittarfia innarluutilinnut pitsaanerusumik tulluarsaasariaqarpoq
Attaveqaqatigiinnermut naalakkersuisumut allakkat ammasumik Tilioq nassiussaqarpoq: Mittarfinni attaveqaqatigiinnermilu atortuni tamanut tulluarsaalluni ilusilersuinerit tikikkuminassutsillu pilersissigit
Kangerlussuup mittarfiata siunissami atuutiinnarnissaanik erseqqissaasoqarnerata kingorna Inuit Innarluutillit Illersuisoqarfiat Tilioq periarfissaqarumavoq Kangerlussuarmi mittarfimmi tikikkuminaassuseq maluginiarneqaqqullugu taakkulu aamma Kalaallit Nunaanni angallannikkut isumaqatigiissuteqarfiusuni atuummata.
Ilanngullugu mittarfissuarnik sanaartortitsisussat KAIR kaammattorumavarput Ilulissani, Nuummi Qaqortumilu mittarfissat sanaartorneqalerpata tamat naligiimmik periarfissaqartinneqarlutik sanaartukkanut isersinnaasalernissaat qulakkeerumaaraat.
Tilioq allakkami ammasumi allappoq.
Iluarsisariaqartut arlallit
- Nunatta iluani angalasut Kangerlussuarmut aqqusaarnerminni isaariakkut tummerarpassualikkut ingerlasariaqartarput, terminalimi check-in, tammajuitsussanik pisiniarfik kantine neriniartarfillu iserniarunikkit. Tummerarpassuillu aamma ingerlavigeqqeqqaarlugit Hotel Kangerlussuup receptionia pallinneqarsinnaavoq, Tiliumut oqaatigineqarpoq.
- Elevatorilu ajortoq pillugu Inuit Innarluutillit Illersuisuat Christina Johnsen Mittarfeqarfinnut maajimi 2019-imili allakkatigut attaveqalerpoq suli maannamut iluarsiinermik kinguneqanngitsumik, angallassinermi ulapaarfiunerata nalaa peqqutaatinneqarluni suli elevatorimik iluarsiisoqanngitsoq, innarluutillinnut illersuisoq Christina Johnsen allappoq.
Kangerlussuup mittarfiani tamanna kisimi ajornartorsiutigineqanngilaq.
- Innarluutillit Narsarsuarmi Nunattalu Kujataani ( Namminersorlutik Oqartussat aamma angalatitseqatigiiffiup angallassinissamik isumaqatigissuteqarfigisaanni )angalasut tikikkuminaassutsimik tunngaveqartunik assigiinngitsunik ajornartorsiutinik misigisaqartarput, soorlu illoqarfinni nunaqarfinnilu sissami angalasussanut utaqqisarfiit (terminalet) aamma angallatit inunnut innarluutilinnut naleqquttut amingaatapput, taamatullu ajornanngitsumik pisariitsumillu illoqarfinnut nunaqarfinnullu tikissinnaaniassammata.
Naalakkersuisut sumiginnaasut
Taamatut angallassinermik aaqissuussani Naalakkersuisut inuit innarluutillit pisariaqartitaannik pisinnaatitaaffiinilu immikkoortoq 20-imik tassa kikkut tamarmik sumulluunniit ingerlasinnaanerannik tunulliussissartut tikkuarneqarpoq.
- Pisinnaatitaaffik naapertorlugu Kalaallit Nunaata inuit innarluutillit ajornanngitsumik sumulluunniit ornigussinnaanerat isumagissagaat. Inuit innarluutillit nammineq aalajangissavaat sumut qanorlu ornigukkusunnerlutik. Angallassineq taminit akilerneqarsinnaasumik akikitsumillu ikiorsiinissamut aqqutissiuisuussaaq, Tilioq allappoq.