Tilioq: Inuit innarluutillit peqataatinnerusariaqarput
Inuit innarluutillit illersuisuata Tiliullu sapaatip akunnerani kingullermi ataatsimiisitsinerani inuit 80-it sinnerlugit peqataapput. Ataatsimiinnermi inuit innarluuteqartut inuiaqatigiinni peqataatinneqarnerunissaat oqallisigineqarpoq.
Peqataatitsineq sorpassuusinnaavoq. Aamma inuit innarluutillit pineqartillugit.
Tilioq novemberip aqqarnani ataatsimiititsivoq, tassani naalakkersuisoqarfiit, kommunit, inuit innarluutillit peqatigiiffiinit, peqqinnissaqarfimmit, inuussutissarsiortunit aamma kattuffinnit kiisalu sulisartut kattuffiinit peqataasoqarluni, aamma naalakkersuisut sisamat peqataaffigisaannik, taakkunannga peqqissutsimut isumaginninnermullu naalakkersuisoq, Martha Abelsen aamma peqataalluni.
Inuit innarluutillit ulluinnarni unammillertagaat qulit oqallisigineqarput:
- Suliffeqarnermi
- Meeqqat atuarfiat
- Orninneqarsinnaasuni tikikkuminassuseq attaveqatigiinnerlu
- Tamat oqartussaanerat
- Inuiaqatigiit isiginnittariaasiat
- Digitalimi atuinermi atoruminassuseq
- Illoqarfinni nunaqarfinnilu tikikkuminassuseq
- Ilinniarfiit
- Piorsarsimassuseq sunngiffillu
- Peqqissuseq
- Ataatsimiinnermi peqataasut amerlanerat Tiliumut pingaaruteqarluinnarpoq. Innersuussutigineqartut peqataasunit apuunneqartut Tiliup kisimi suliarinngilai. Sakkussappulli inuiaqatigiinnit atorneqarsinnaasut. Tassa peqataatitsinermi, Christina Johnsen Sermitsiaq.AG-mut oqarpoq.
Innersuussutit
Christina Johnsen erseqqissaavoq inuit innarluuteqartut, aamma meeqqat inuusuttullu innarluuteqartut, inuiaqatigiinni peqataarusussuseqartut, innarluutiminnit akunnattooruteqanngikkaluarlutik.
- Peqataatitsineq tassaasinnaavoq, meeraq ersinngitsumik innarluuteqartoq specielklassemilu atuartoq, meeqqat atuarfianni inaarutaasumik misilitsissasoq. Peqataatitsineq aamma tassaasinnaavoq suliffeqarfiup inuk innarluuteqartoq atorfinitsippagu. Taama iliornitsinni inuit innarluuteqartunit ilikkagaqarsinnaavugut, susinnaasut, qanoq pissuseqarfigisinnaagigut aammalu uatsitulli ittuusut.
- Peqataatitsinerulissagutta, taava aamma paqumiginnikkunnaartariaqarpugut, oqarpoq.
Sammisat qulit pillugit ataatsimiinnermi peqataasut assigiinngitsunik arlalinnik innersuussuteqarput. Inuit innarluutillit illersuisuata erseqqissaatigaa innersuussutit kommuninut, naalakkersuisunut, inatsisartunut, tusagassiorfinnut, ilinniarfinnut suliffeqarfinnullu isumassarsiorfittut atugassatut suliaasut.