Tilioq: Atuartut immikkut atuartinneqartut inuiaqatigiinnit sumiginnarneqarput
Meeqqat immikkut atuartinneqartut 12 procentii atuartitsissummi ataatsimi amerlanerniluunniit ukiuni tallimani kingullerni inaarutaasumik misilitsissimasarput. 8%-iinnaallu naammassinnissummik projektimik suliaqarsimallutik. Meeqqat immikkut atuartinneqartut sumiginnarneqarsimasut, inuit innarluuteqartut oqaaseqartartuat isumaqarpoq.
Meeqqat atuarfiini angajulliit inaarutaasumik misilitsinnissaat piffissanngorluinnarpoq. Meeqqalli immikkut atuartinneqartut amerlanerpaartaat inaarutaasumik misilitsinnavianngillat.
Tilioq tusagassiorfinnut nalunaaruteqarluni tikkuaavoq meeqqat immikkut atuartinneqartut affaat ataaterujussuarlugit inaarutaasumik misilitsinneqartartut. Taamallu periarfissakitsitsineq sumiginnaanerusoq, Tilioq isumaqarpoq.
Ilinniartitaanermut aqutsisoqarfiup nalunaarusiaani kisitsisaatigineqalerpoq meeqqat immikkut atuartinneqartut 12 procentii fagini ataatsimi amerlanerusuniluunniit ukiuni tallimani kingullerni inaarutaasumik misilitsissimasut. 8 procentii naammassissummik projektimik suliaqarsimasut nalunaarsorneqarsimavoq.
- Kisitsisit takutippaat inuiaqatigiiit qanoq naatsorsuuteqanngitsigisut aamma iliuuseqanngitsigisut, killiffillu meeqqanut ataasiakkaanut tunnganngilaq, Tilioq tusagassiorfinnut nalunaaruteqarluni allappoq.
Inuiaqatigiit suliniutikinnerannik takutitsineruvoq
- Sammisami naatsorsuilluni kisitsisit pigineqalermata pitsaavoq, tassami ajornartorsiutip annertussusaa maanna takuneqarsinnaalerpoq. Nalunaarut nikallornartuuvoq, ilimagisatsinnummi naqissusiimmat, tassa immikkut atuartut ima ikitsigisut inaarutaasumik misilitsittarmata, Inuit Innarluutillit Illersuisuat Anja Hynne Nielsen oqarpoq.
- ima amerlatigisut inaarutaasumik misilitsinnissamut peqataannginnissaannut akuersisoqartarmat, inuiaqatigiit naatsorsuuteqannginnerujussuannut anguniagaqannginnerujussuannullu takussutissiiginnarpoq- aammali iliuuseqartoqanngitsoq politikkikkullu pingaarnersiorneqannginnerannik tikkuussivoq, oqarpoq.
Tilioq saaffigineqartartoq
Tilioq tusagassiorfinnut nalunaarutimini ilisimatitsivoq angajoqqaat immikkut atuartinneqartunik meeraqartut Tiliumut saaffiginnittartut. Taakku oqaluttuarput atuartitsineq "ornittagaannartut" isigineqarsinnaasoq, atuartut soraajaartinneqartartut ilaannilu kisimiitiinnarneqartartut.
- Tassa paquminarsaaneruvoq, ilisimasakinnermik kiisalu anguniagaqannginermik takussutissiisoq, tamannalu innarluuteqarnermut suliassaqarfimmut naliginnaavoq, Anja Hynne Nielsen oqarpoq.
Atuartut immikkut pisariaqartitsisut maanna aningaasaliiffigineqannginnerujussui inuiaqatigiinnut siunissami akisunerulissaaq. Atuartummi inaarutaasumik soraarummeersinneqarsimatigatik ilinnialernissamut periarfissaqartitaanngillat.
Pitsanngorsaatissat ujartorai
Inatsisartunut ilaasortap Nivi Olsenip (D) meeqqat immikkut atuartinneqartut soraarummeertinneqarnissamut periarfissaat misissoqqullugit suliakkiineratigut nalunaarusiaq piareerneqarpoq. Nunatsinni inuit innarluutillit kattuffiisa, NIIK-p tamanna aamma ujartorsimavaa.
Inuit innarluuteqartut illersuisuata tikkuarpaa meeqqat immikkut atuartinneqartunut pitsanngorsaasoqarnissaa annertuumik pisariaqartinneqartoq, meeqqat Naalagaaffiit Peqatigiit nalunaarutaat malillugu ilinniagaqarnissamik pisinnaatitaaffeqartinneqarnerat naammassineqassappat.
- Tiliumiit kissaatigineqarpoq paasissallugu, Naalakkersuisut immikkut atuartut inaarutaasumik misilitsittarnissaat qulakkeerniarlugu qanoq iliuuseqarniarnersut. Una naatsumik nalunaarut tusaanngitsuusaarneqarsinnaanngilaq, Tiliumiillu malinnaavugut oqaloqatiginnikkusuppugullu, Inuit innarluutillit illersuisuat Anja Hynne Nielsen oqarpoq.