Tilioq Qeqqani suliaq pillugu: -Akuersaarneqarsinnaanngilluinnarpoq
Sulianik ingerlatsinerluttarneq kommunini tamani ajornartorsiutigineqartartoq, inuillu inatsisitigut illersugaanerat tatineqartoq, innarluutillit illersuisuat ombudsmandip kommunimut sakkortuumik isornartorsiuineranut atatillugu oqapoq.
Ombudsmandip novembarip qaammataata qiteqqunnerani oqaatigaa, Qeqqata Kommunia meeqqap tapersersorneqarnissaa pillugu suliami 'amerlasoorpassuarnik assullu ilungersunartunik kukkussuteqarsimasoq'.
Kommuni meeraq atugarliortoq pillugu ukiuni arlaqartuni nalunaarutisisaraluarlunin aammattumik meeqqamut ikiorsiissuteqarnissamik tapersiissuteqarnissamillu isumaginnissimanngilaq.
Innarluutillit illersuisuat Anja Hynne Nielsen maanna oqallittunut akuliuppoq, suliarlu akuersaarneqarsinnaanngilluinnartutut oqaatigalugu:
- Akuersaarneqarsinnaanngilluinnarpoq. Kommunip meeraq 9-nik ukiulik ikiussallugu tapersersussallugulu kivissinnaasimanngilaa, taanna tusagassiorfitsigut nalunaaruteqarnermi oqarpoq.
Misissorneqaranilu ikiorserneqarsimanngitsoq
Ombudsmandip oqaatigaa, kommuni piffissap ukiut sisamaat avillugit sinnerlugit sivisutigisup ingerlanerani meeraq pillugu arfineq-pingasoriarluni nalunaarfigineqartarsimasoq. Nalunaarutip siulliup tiguneqarnerani meeraq qulingiluanik ukioqarsimavoq, kommunimillu nalunaarutiginninnerit isumaginninnikkut misissuinermik aallartitsinissamut pissutissaqalersitsinersut aalajangiinissani sumiginnarsimagaa.
Innarluutillit illersuisuata meeqqap ersinngitsumik innarluuteqarsinnaanerata misissorneqarsimannginnera isornartorsiorpaa, Sermitsiaq.AG-mullu oqaatigalugu, suliami ataatsimi taamak kukkusoqartigisimanera ilungersunarluinnartoq:
- Misissorneqaranilu ikiorserneqarsimannginnerata kingunerannik meeraq suli ajornerujussuarmik atugaqalerpoq, ikiorserneqarniarneralu ajornarnerulingaatsiarluni. Anaanaasoq ikiortissarsiortarsimagaluarpoq, piffissallu ingerlanerani annertuumik tatineqarsimalluni sulisinnaajunnaarsimallunilu.
Ilaqutaasut tamarmik eqqorneqartartut
- Meeraq eqqorneqaraangat ilaqutaasut tamarmik eqqorneqartarput, Anja Hynne Nielsen oqarpoq.
Innarluutilinnut illersuisoqarfimmit innuttaasut Tiliumut saaffiginnittarnerannik ukiumoortumik nalunaarusiaq naapertorlugu, kommunit sivisuallaamik sullissisarnerat innuttaasut innarluutillit inatsisitigut innarlitsaaligaanerannut ajoqutaalersinnaavoq kiisalu misissuisoqartannginnera aamma katsorsaasoqartannginnera inuiaqatigiinnut annertuumik ajornartorsiutaalertarlunilu aningaasartuutaasarpoq.
- Ajornartorsiut ilungersunartoq tamanna politikkerit akisussaaffittut tigusariaqarpaat ingerlaannartumillu erseqqissaassutigalugu. Aaqqissuussaanikkut ajornartorsiutit annertusinnginnerini aaqqiisinnaassuseqartunik pisariaqartitsivugut, Anja Hynne Nielsen oqarpoq.
Innarluutillit illersuisuata Sermitsiaq.AG-mut oqaatigaa, innarluutilinnut illersuisoqarfimmit Kommuneqarfik Sermersuumi pisimasoq pillugu siusinnerusukkut saqqummiussisimallutik, tassani meeqqamut anaanaasup meeqqani ADHD-qartoq autismeqartorlu oqaluttuaraa. Anaanaasoq oqaluttuarpoq, atuarfimmi meeqqami nappaataanut naapertuuttunik neqerooruteqartoqanngimmat, meeraq ukiumut taamaallaat ullut qulit missaanni atuartartoq.
Pisortaaneq: Sapinngisamik suliarineqarpoq
Innarluutillit illersuisuata oqaatigaa, meeraq atuariartortanngippat kommunimit qisuariartoqarnissaa pingaaruteqarluinnartuusoq.
Sermitsiaq.AG-mit suliaq ombudsmandip suliarisimasaa pillugu Qeqqata Kommunianit oqaaseqartitsiniartoqaraluarpoq. Ilanngutassialli matuma saqqummiunneqannginnerani tamanna iluatsinneqanngilaq, kommunimili isumaginnittoqarfiup pisortaanea Martha Lund Olsen KNR-imut oqarsimavoq, isumaginninnermi siunnersortitut ilinniarsimasunik sineriammi sulisussarsiorneq ajornarneruleraluttuinnarmat suliaq eqqortumik isumagineqarsimanngitsoq:
- Iliuuseqartoqarsimanngitsoq oqarsinnaanngilanga. Sapinngisamik suliarineqarpoq. Peqqissaarunneqarsimanersorlu oqallisigineqarsinnaavoq, Martha Lund Olsen KNR-imut taamanikkut oqarsimavoq.