Tilioq naalakkersuisooqatigiinnissamik isumaqatigiissut nutaaq pillugu: Innarluutillit ataasinnguamilluunniit oqaaseqarfigineqanngillat

Innarluutillit illersuisuata naalakkersuisooqatigiit inuit innarluutilæit puigorsimaneraat imaluunniit Naalakkersuisut innarluutilinnut tunngasutigut suliassaqarfimmik pitsaanerulersitsiniarnissamik anguniagaqarnersut apeqquserpaa.

- Maluginiarparput inuit innarluutillit, inuit innarluutillit pisinnaatitaaffii aamma innarluuteqarnermut susassaqartut oqaatsimik ataatsimilluunniit taaneqanngimmata. Inuit Ataqatigiit aamma Naleqqap ukioq kingulleq naalakkersuisoqatigiinnissamut isumaqatigiissutaanni immikkoortumik innarluuteqarnermut tunngasunik suliassat allaaserineqarput aamma Tiliup aningaasaqarnera naleqquttuusariaqartoq taaneqarluni, innarluutillit illersuisuat Anja Hynne Nielsen oqarpoq.

Annertuumik ernumatitsisoq

Innarluutillit illersuisuata erseqqissaassutigaa, ukioq 2022 pingaaruteqartoq, tassa Naalakkersuisut pisussaaffilerneqarsimagamik inuit innarluuutillit pisinnaatitaaffii pillugit naalagaaffiit peqatigiit isumaqatigiissutaannik Kalaallit Nunaata eqquutitsinera pillugu qulajaanissaannut, tamatumalu kingorna iliuusissatut pilersaarusiornissaannut.

Innarluutillit illersuisuata oqaatigaa, nassuiaat maajip qiteqqunnerani saqqummiunneqartussaasoq, tamatumalu kingornatigut innarluutilinnut tunngasutigut suliassaqarfimmi iliuusissatut pilersaarusiortoqartussaasoq.

- Naalakkersuisoqatigiit isumaqatigiissutaanni innarluuteqarneq sammineqanngimmat tamanna inuit innarluutillit illersuisuattut isumakulunnartoqartippara. Tassami pineqartut inuit ulluinnarni pisinnaatitaaffitik naapertorlugit allatuulli inuuneqarniarnissaminnut sukataaruteqartuartuupput aamma eqqortumik ikiorneqarnissamut tapersersorneqarnissamullu ilungersuuteqartuartuupput, Anja Hynne Nielsen oqarpoq, nangillunilu:

- Ila neriuppunga naalakkersuisoqatigiit isumaqatigiissutaanni taaneqanngimmata tamanna puigortoornerinnaasoq, naalakkersuisullu tamanna aaqqiiviginiarlugu innarluuteqarnermut tunngasunik politikkikkut anguniakkaminnik oqariartuuteqassasut, taavalu inuit innarluutillit atugaat pitsanngorsarumallugit qanoq iliuuseqassanerlutik oqariartuuteqarlutik.

Inatsisit amigaataasut

Naalakkersuisooqatigiit siuliisa, tassa Inuit Ataqatigiit Naleqqallu neriorsuutiginikuuaat, innarluutillit pillugit inatsit maanna atuuttoq misissoneqassasoq, partiit pineqartut naapertorlugit inatsimmi aporfissaqartoqarlunilu sanngiiffeqartoqartoq.

Innarluutillit illersuisuata oqaatigaa, inunnik innarluutilinnik naligiissitsisisinnaasumik suli inatsiseqartoqanngitsoq.

- Kusanarpoq naalakkersuisoqatigiinnissamut isumaqatigiissummi tamat naleqassusaat isiginiarneqarmat, uani soorlu suliffeqarnermi aamma inuuniarnermi, tamat oqartussaaqataatinneqarlutik aqutsinermi aamma inatsisiliornermi, kisianni inuiaqatigiinni eqimattat immikkut isiginiarneqarpata kiisalu inuiaqatigiinni ikinnerussuteqartut amerlasuut tassaasut inuit innarluutillit mininneqarpata, allaanngilaq immikkoortinneqartut, naalakkersuisut qinnuigissavagut, taama pisoqarnera piaarinerunersoq erseqqissaaqqullugit, innarluutillit illersuisuat naggasiivoq.

Sermitsiaq.AG-mit naalakkersuisooqatigiit nutaat isornartorsiummut atatillugu oqaaseqartinniarneqarput.