Tilioq misissueqqissaarpoq: Ikiortissarsiorneq ajornakusoortartoq

Inuit innarluuteqartunut sullissivik Tilioq inunnit innarluuteqartunit aamma ilaqutaasunit 152-init 2022-mi saaffigineqarsimavoq. Ukiup siulianut sanilliullugit amerlanerupput.

Inuit innarluuteqartut pillugit saaffiginninnerit qimerlooraanni, suut saaffiginnissutaasarnersut Tiliumit inuillu innarluuteqartut oqaaseqartartuannit ilisarineqarsinnaalluarput.

- Ukiuni siuliinisut pisortat suliffeqarfiutaannit annertuuti- gut, ingammik innuttaasunik sullissinikkut, sumiginnaa- nerit maluginiarsimavavut. Ukiumiit ukiumut saaffiginnis- sutaasartunit tamanna qulequttani ersarinnerpaasima- voq. Misissueqqissaarnermi matumani ajornartorsiutit aalajangersimasut ukkatarissavagut, taakkuupput innut- taasut ikiorserneqarnissaminnut ujartuigaluarnerminni pisortanit sumiginnagaanermit kingunerluutit, misissueqqissaarnermi allassimavoq.

Innuttaasut arfineq-pingasut sullissisuminnit toqqaannartumik immikkoortinneqartutut misigalutik saaffiginnissimapput. Misissueqqissaarnermilu maluginiarneqarpoq innuttaasut tallimaagaangata ataaseq sullissinermut tunngatillugu ajornartorsiuteqarluni saaffiginnissimasartoq. Ajornartorsiutit saaffiginnissutigineqartut ilagaat saaffiginninnermi allagaatit sullissisumit tammaaneqartarnerat, utaqqingaatsiartarneq, aalajangiinerni tunngavilersuuteqartoqarnera naammagittaalliorsinnaanermullu siunnersuisoqartannginnera.

Inatsisitigut isumannaassuseq annikinnerusoq

- Ukioq manna aamma ersarippoq innuttaasut inatsisitigut isumannaatsumik sullinneqannginnerat. Innuttaasunit tusartarparput ajornartorsiut utertuartoq, ukiunilu siuliini innuttaasut saaffiginnissutaanni nalunaarsortuarparput sullissinermi amigartumik ilisimasakinneq, sanngiinneq aamma paatsiveerusimaneq. Kommunini ataaseq minillugu innuttaasut ajornartorsiut naapittuagaat taannaavoq, Tilioq tusagassiorfinnut nalunaaruteqarluni allappoq.

Ajornartorsiutit uteqqittarneri pissutigalugit Tilioq innersuussuteqarpoq saaffiginniffik ataasiinnanngoqqullugu, oqartussat akornanni suleqatigiinneq annertusaqqullugu kiisalu inuit innarluuteqartut sullinneqarnerannik pitsanngorsaanissamut Naalakkersuisut ilaatigut suliniuteqarneroqqullugit.

- Erseqqip­poq inatsisit isumaqatigiissutillu inunnut innarluutilinnut pisinnaatitaaffiinik kisimik qulakkeerinninngitsut. Ajornartorsiutit nalunaarusiami matumani paasissutissiissutigisatta ilarpas­sui ilungersunartuupput, Naalakkersuisullu Inatsisartullu, kommunit atuarfiillu, peqqinnissaqarfik politiillu taakku pimoorussillutik akuliuffigisariaqarpaat. Aamma taakku tamarmik suliniuteqaqatigiittariaqarput, Kalaallit Nunaata pisussaaffiinik eqqortitsinissaq piinnarnagu, aammali Kalaallit Nunaanni innuttaasut pineqarmata, taakkualu inuulluarnissaat atugarissaarnissaallu ilungersuutigine­qartariaqarmat, inuit innarluutillit pillugit oqaaseqartartoq Anja Hynne Nielsen oqarpoq.

Innuttaasut saaffiginninnerik misissueqqissaarnermit nalunaarusiaq Tiliup nittartagaani atuarsinnaavat.