TILIOQ MIO-lu: Ombudsmandip uparuaatai pimoorunneqartariaqarput

Isorisarialerujussuuvoq! Inatsisartut Ombudsmandiata Qeqqata Kommuniani piffissap suliamik meeqqap tapersersortimik ikiorteqalernissaanik qinnuteqaatip suliarineqarneranut tunngasumik suliarinninnermi atugaa pillugu taama uparuaateqarpoq.

Ombudsmandip uparuaanera una siullerpaajunngilaq, tassami nunatsinni kommunit kukkuneqarujussuartunik kiisalu piffissamik sivisuallaarujussuartumik atuillutik sulianik ingerlatsisarnerannik siornatigut uparuaasareerpoq.

- Taamatullu Ombudsmandip naliliinera ilungersunartutut tiguneqartariaqarpoq, tassami Namminersorlutik Oqartussat aamma kommunit inatsisit atuuttut ingerlatsinermilu ileqqorissaarneq tunngavigalugit ingerlatsinerat Inatsisartut sinnerlugit Ombudsmandip nakkutigisarai.

Ombudsmandilu suliamut tunngasumik uparuaappat, taava inatsit suliamut atuuttoq naapertorlugu naammanginartumik iliuuseqartoqarsimassanngilaq. Uanilu meeqqat tapersersorneqarnissaannut inatsit pineqarpoq.

Illersuisut taakku marluullutik oqaatigaat, meeqqanut innarluutilinnut suliani eqqunngitsumik kingusissumillu aalajangiisarnerit meeqqamut ilaqutaanullu sunniuteqarnerluttartut, taakkulu meeqqat pisinnaatitaaffii pillugit isumaqatigiissummut kiisalu inuit innarluutillit pillugit isumaqatigiissummut naapertuuttanngillat malinnittaratillu - Kalaallit Nunaannilu meeqqat sanngiinnerusumik inissisimasut eqqarsaatigalugit isumaqatigiissutini nalinginnaasumik tunngaviusunik uniuinerusarlutik.

- Aamma ajornartorsiut ilungersunarpoq, kommuninit inatsit naapertorlugu aalajangiisinnaasanngimmata. Inatsisitigullu illersugaaneq eqqarsaatigalugu akuersaarneqarsinnaanngilaq, meeqqammi immikkut pisariaqartitsisut uteqattaartumik pisortat suleriusaannit sumiginnarneqarput, ombudsmandillu isornartorsiuinera iliuuseqarrnermik kinguneqartariaqarpoq, Tilioq MIOlu peqatigiillutik taamatut oqaaseqarput.

Tilioq kommuninut siornatigut inassuteqaateqartareerpoq, pisortat inunnut innarluutilinnut taperserneqarnissamik qinnuteqaatinik akissuteqarnissamut ersarissumik innuttaasuniillu pissarsiarineqarsinnaasunik piffissaliinernik atuutilersitsissasut, minnerunngitsumillu sulianik suliarinnittarnerup pitsaassusaa qulakkeerneqarnissaannut suleriaatsinik ersarissunik aalajangersaassasut.

Tiliumiillu kommuninut inassuteqaatigineqarpoq, kommunit meeqqanut innarluutilinnut ataqatigiissaakkanik tamanillu isiginnilluni suliniuteqartarnissaq qulakkiissagaat. Naalakkersuisunullu inassuteqaateqarput meeqqanut innarluutilinnut tamanik isiginnilluni ataqatigiissaakkanillu suliniuteqarnissamik qulakkeerinnittunik suleriaatsit pillugit kommuninut ilitsersuusiussasut.

Tiliumiit MIOmiillu ilisimaneqarpoq, inuit innarluutillit tapersersorneqarnissaannut inatsimmi sulianik ingerlatsisarnermut aalajangersimasunik piffissaliussaqartoq, tassungalu tunngasumik inassuteqarnermi qulakkeerusunneqarpoq kommuninit malinneqarnissaat.

- Ajornartorsiulli ilungersunartoq kingumut tassa takoqqipparput.