Innarluutilli illersuisoqarfiata Tiliup nuannaarutigingaarpaaa Ilisimatusarfimmi isumaginnernermut tunngasunut siunnersortitut ilinniartut 29-it ilinniarnerminnik allagartartaarsimanerat.

Isumaginninnermut tunngasunik suliallit amerlasuut atorfissaqartinneqaetut innarluutillit illersuisuata Christina Johnsenip oqaatigaa.

- Taamaattumik nuannaarutigilluinnarparput ilisimasasi maanna suliffigisassinni atorsinnaareerassigit, qularutiginngilarpullu siunissami atorfissaqartittuarumaarisi.
Innuttaasoq ikiorserneqarnissaminik, ikorfartorneqarnissaminik, siunnersorneqarnissaminilluuniit atorfissaqartitsigaangami kommuunimi isumaginninnermut sullissisut naapeqqaakkajuttarpai, tusagassiutinut nalunaarummi allappoq.

Tiliumi martsiminngaanniilli inunnik innarluutilinninngaanniit, ilaqutaasuninngaanniit kommunimilu sullissisuninngaanniit saaffiginnissutit 60-it sinneqartut tigunikuuaat. 

- Saaffiginnissutit assigiinngitsorpassuupput. Ilaatigut kommuunini aalajangiussanut, atortussanut ikiorsiissutissanut, ikiorserneqarnissamut amigaateqarnernut tunngasuullutik, kommuuninilu sullissisut ikiorsiinissaminnut nalornissuteqarnerannut tunngasuullutik il. il. Taamaattumik nalunngilarput ilisimasasi pisinnaasasilu atorfissaqartilluarneqartut, Christina Johnsen oqarpoq.

Tiliumit nuannaarutigineqarpoq ilinniarlutik naammassisut nunatsinni illoqarfinnik assigiinngitsuninngaanniit aggerfeqarneri. 

- Neriuutigaarpummi tamanna isumaqartoq ilisimasat nunatta sinneranut siaruarterneqassasut. Nunatsinnimi inuit innarluutillit pisinnaatitaaffii piviusunngortinneqassappata atuutsinneqassappatalu isumaginninnermut tunngasunik ilisimasaqarluartut atorfissaqartippagut. Inuit innarluutillit illersuisoqarfianiit Nunarput aamma isumaginninnermut tunngasunut siunnersortinngortut uummammit pisumit pilluaqquavut sulilluarnissaannillu kissaallugit. Ilinniarniarneq illoqarfik qimannagu ingerlanneqarsinnaavoq, neriuppugullu amerlasuut ilinniarnissamut periarfissat annertunerusumik paasiniaavigissagaat, inuit innarluutillit illersuisuat Christina Johnsen oqarpoq.