Tilioq innersuussivoq: Inunnut innarluutilinnut saaffiginnittarfik ataaseq atulerneqarli
Inuit innarluutillit pillugit suliassaqarfimmi susassaqartut 100-t missaanniittut aamma politikerit, Kalaallit Nunaata qanoq ililluni inuit innarluutillit pilluigit isumaqatigiissutit atuutilersissanerai pillugit Naalakkersuisunut pingasunik aalajangersimasunik inassuteqarput.
Inuit innarluutillit tapersersorniarlugit massakkut aamma siunissaq ungasissoq eqqarsaatigalugu sammiveqartumik suliniuteqarfigineqarnissaannik pisariaqartitsisoqarpoq. Inuit innarluutillit illersuisoqarfiata Iluliussani ullut pingasut isumasioqatigiissitsillunilu ataatsimeersuartitsinerata kingorna, Tiliup oqariartuutaa naatsoq taama ersaritsigaaq.
Inuit innarluutillit arlallit ataatsimeersuarnermi innarluutertik pillugu aamma sullissivinnik misigisaminnik oqaluttuarput, tassani unammilligassarpassuit misigineqartarput.
Siunnersuutit suliarineqarnissaat pingaaruteqartoq, ataatsimeersuarnerup naammassinerata kingorna inuit innarluutillit illersuisuata Anja Hynne Nielsenip oqaatigaa, taamaalilluni inunnut innarluutilinnut atukkat pitsanngoriarniassammata.
- Aammaarlutik ersarissisippaat, siunissaq pinartullu eqqarsaatigalugit sullissinerup aaqqissuussaanerata piffissap sivikitsup iluani aaqqiissuteqarfigineqarnissaanik pisariaqartitsisoqartoq, Anja Hynne Nielsen oqarpoq.
Attaveqarfissat
Inuit 100-t missaanniittut peqatigiiffinnit, susassaqartut, kattuffiit, kommunit aamma Naalakkersuisut ataatsimeersuarnermut peqataapput. Ataatsimeersuarneq suliassanik aalajangersimasunik pingasunik malitseqarpoq, tassanilu aamma oqartussanut inassuteqaatit nassaarineqarsinnaapput.
Inuit innarluutillit pillugit suliassaqarfiup allanngortiterneqarnissaa taakku ilagaat, taamaalilluni inuit innarluutillit tapersersorneqarnissamut inatsimmut tunngatillugu saaffiginninnissaq aamma oqartussanit tapersersorneqarnissaq ajornannginnerulissammat.
- Piffissami sivisuumi Tiliup tunngavilersuutigaa saaffiginnittoq pitsaanerpaamik ikiorneqapallannissaa qulakkeerneqarsinnaaniassammat, innuttaasoq saaffiginnittarfimmut ataatsimut attaveqartassasoq, Tilioq tusagassiuutinut nalunaarummi taama nalunaaruteqarpoq.
Tilioq naapertorlugu kajumissaarut tamanna arlalinnit, ilaatigut Naalakkersuisoq Mimi Karlsenimit isumassarsiatsialattut ersersitsivigineqarpoq.
Inuk qitiutillugu
Tamatuma peqatigisaanik aaqqissuussaanerup innuttaasunut naleqqussarneqarnissaa pingaaruteqartoq, inuit innarluutillit assigiinngilluinnartumik pisariaqartitsisinnaammata, taamaalillutillu assigiinngitsutigut tapersorsorneqarnissamut periarfissaqartariaqaraluartut, ataatsimeersuarnermi peqataasut oqaatigaat.
- Inuit innarluutillit tamarmik allatuulli assigiinngitsuupput – namminerlu aalajangiisinnaassuseqarnermut pisinnaatitaaffik qulakkiissagutsigu aamma nunat tamat pisussaaffii qulakkiissagutsigit, soorlu Naalagaaffiit Peqatigiit Inuit Innarluutillit pillugit isumaqatigiissutaat, assigiinngisitaarneq akuersaartariaqarparput. Ataasiakkaanut aaqqiisinnaasariaqarpugut aamma inuk qitiutillugu ukkassisariaqarpugut. Nunarsuarmi sumiiffinni allani taamaasiortoqartarpoq. Soorunami aamma Nunatsinni taamaaliorsinnaassaagut, Anja Hynne Nielsen oqarpoq.
Pingajuattut Tiliup siunnersuut aqqutissioqataaffiginikuusaa tassaavoq, Nunatsinni inuit innarluutillit peqatigiiffii ataatsimeersuarneranni paasititsiniaanermik #taasinerittitusindit saqqummersikkamikku. Paasititsiniaanerup siunertaraa innarluuteqarneq pillugu paqumisuttarneq unitsinneqarnissaa nunalu tamakkerlugu inuit innarluutillit politikkikkut allannguisoqarnissaanik ilungersuuteqarfigineqarnissaa