Tilioq innarluutillit atugaat pillugit eqqumanerulerpoq

Inuit innarluutillit Illersuisuata Anja Hynne Nielsenip nutaaliorluni innarluuteqarnermut tunngatillugu ineriartortitsinissaq kiisalu piujuartitsilluni aaqqiissuteqarnissaq siunertaralugu innarluuteqarnermi susassaqartut Nuummi maajip aappaani naapinnissaai qilanaaraa.

- Tamannalu tunngavigalugu Tiliumiit Jens Wandel qaaqquarput, taanna Bevica
Fondenimi aamma FN’-ip generalsekretærianut Anthonio Guterres immikkut siunnersortaasimasoq ataatsimiinnermik ammaassammat, Tilioq ataasimiinnissaq sioqqullugu allappoq.

Ineriartortitsinissaq ukkatarineqassasoq

Nuna tamakkerlugu peqataasussat 60-iupput, tassa inuit innarluutillit peqatigiiffiinit kattuffinniilu peqataasoqassaaq, soorlu aamma suliamut ilinniarsimasut, atorfilittat, Kommunalbestyrelsinut, Inatsisartunut, Naalakkersuisunullu ilaasortatut qinikkat peqatigalugit innarluuteqarnermut sammisami piujuartitsisumik qanoq ineriartortitsisoqassanersoq oqallisigineqassalluni.

- -Inuit innarluutillit illersisoqarfiannut Tiliumut pingaaruteqarpoq, Inuit innarluutillit pisinnaatitaaffiisa inuiaqatigiinni tamatigoortunngortinneqarnissaat, ineriartortinneqarlutik aamma siuarsarneqarlutik. Tamannalu tunngavigalugu Jens Christian Wandel, FN-imi 1988-imili sulisoq qaaqquarput, taamaasilluta iliuusissanik oqallittoqalernissaa anguniarlugu, inuiaqatigiinni tamanut iluaqutaasussanik periarfiissiisunillu
aaqqiissutinik aningaasaliisoqassasoq, Inuit Innarluutillit Illersuisuat Anja Hynne Nielsen oqarpoq.

Oqallinnerup tunngaveqarluarnissaa qulakkeerniarlugu Jens Christian Wandel aamma Inuit pisinnaatitaaffii pillugit instituttimi immikkut siunnersorti Mette Frandsen saqqummiissapput, soorlu aamma Kristine Jensen Mørch Sanami siunnersortimit aamma inuit innarluutillit peqatigiiffiinit saqqummiisoqartassaaq.

Festivali

Nuummi innuttaasut arfininngornermi apriilip 30-ani Tliup festivalertitsinissaanut qaaqquneqarput. Festivalimut kulturikkut illorsuarmi Katuami ingerlanneqartussamut qulequtsiunnearsimavoq 'Live, Laugh, Leave no one behind'.

- Nunatsinni inuit innarluutillit peqatigiiffii kattuffiiilu peqataassapput, inuit innarluutillit oqariartuuteqassapput, ilisimasallit saqqummiillutik kiisalu inuit innarluutillit suliaannik
tuniniaasoqassalluni, ilisimatitsissutigineqarpoq.