Tilioq amerlanerusunit saaffigineqartalersoq
Inunnik innarluutilinnik sullissivik Tilioq 2020-mi innuttaasut innarluutinut atatillugu pisinnaatitaaffimminnut siunnersorneqarniarlutik ilitsersuunneqarniarlutillu saaffiginnittut amerlaeriarnerannik misigisaqaqqippoq.
Inunnik innarluutilinnik sullissivik 2017-imi pilersinneqarmalli innuttaasullu saaffiginnissutaat nalunaarsorneqartalermatali Tiliumut innuttaasut saaffiginnissutaat katillugit 614-iusimapput. 2019-imi saaffiginnissutit 212-iupput, 2020-millu 249-nut amerleriarsimallutik. Taakkua tassaapput innuttaasut innarluummut atatillugu pisinnaatitaaffitik pillugit siunnersorneqarniarlutik ilitsersorneqarumallutillu saaffiginnittartut. Tilioq naliliivoq, saaffiginnissutit amerleriarsimasut, Tilioq innuttaasuni ilisimaneqarnerulersimammat aamma siunnersuisarnermik ingerlataqarnerannik tatiginnittoqarmat.
Aviisi Sermitsiaq taama allappoq.
- Tiliup ilisimaneqarnerulersimaneranik ilimagisaqarneq aamma pissuteqarpoq, nunaqarfinnit Tunumillu saaffiginnissutit amerleriarsimanerannik takusaqarsimanitsinnik. Nalilersuinermit aamma takutinneqarpoq, Tiliup siamasinnerulersimasooq inuillu innarluutillit akornanni tatigineqarnerulersimasoq, saaffiginnissutit ilarpassui inunnit innarluutilinneersuusalersimammata, ilaqutaasut suliamullu tunngasunik ilisimasaqartut saaffiginnittarnerinut taarsiullugu, nalunaarusiami oqaatigineqarpoq.
Saaffiginnissutit nunatsinni kommuninit tamaneersuupput, illoqarfinnit nunaqarfinnillu. Kommuni Tiliup saaffiginnissutinik amerlanerpaanik tigusaqarfigisimasaa tassaavoq Avannaata Kommunia. Tilioq inerniliivoq, tamanna pissuteqartoq maajimi 2020-mi Qaanaamiissimanerminnik nunaqarfiiniissimanermillu.
Aviisimi Sermitsiami atuarnerusinnaavutit. Aviisi uani pissarsiariuk: