Tikittussanut malittarisassaqannginnerup umiarsuarmik takornariartitsinissat eqqornerluppai
Umiarsuarnut takornariartaatinut atatillugu ilaasut qanoq pineqartassanersut Naalakkersuisunit suli nalunaarutigineqanngilaq. Tamanna takornarialerisut pakatsinarnerarpaat. Umiarsuit takornariartaatit siulliit qanittukkut tikittussaapput.
Umiarsuit takornariartaatit assigiinngitsut 256-it ukioq manna Nunatsinnukarnissaraluartik taamaatiinnarpaat. Tikittussaraluilli 145-t suli nalorninarput, tamannali allanngoriataarsinnaasoq, Nunatsinni takornariartitsinermut siunnersuisoqatigiinnit, Visit Greenlandimit aamma issittumi umiarsuakkut takornariartitsisartut peqatigiiffiannit, AECO-mit, ataatsimoorluni Issittumi umiarsuarnik takornariartitsisarnerup akilersinnaasumik ineriartortinneqarnissaanik pingaarnerusumik anguniagaqartumit oqaatigineqarpoq.
Aviisi AG allappoq.
- Qulakkeerlugu suli paasisaqanngilagut, piffissarmi manna tikillugu Naalakkersuisunit imaluunniit Namminersorlutik Oqartussanit umiarsuarnik takornariartitsineq ukioq manna qanoq pissanersoq aamma umiarsuarnik takornariartaatinik tikittoqassagaluarpat qanoq malittarisassaqassanersoq nalunaaruteqartoqanngimmat, Visit Greenlandimi pisortaq Julia Pars oqarpoq, ilanngullugulu oqaatigalugu Visit Greenland aamma AECO arlaleriarlutik saaffiginnittarsimagaluartut.
Periarfissaq kingulleq
Umiarsuaq tikittussaq siulleq juulip 30-anni tikittussaavoq, tassa sapaatip akunneri pingasuinnaat qaangiuppata, Naalakkersuisulli imaatigut avataanit tikittunut qanoq malittarisassaqassanersoq suli nalunaarutiginngilaat. Tamatumunnga sanilliullugu silaannakkut angallannermut atatillugu tikittussanut aallartussanullu malittarisassaliornissaq politikikkut pilertortumik suliarineqarpoq.
Ilanngutassiaq tamaat AG-mi atuaruk – ugguuna iserfigisinnaavat: