Tikinnermi akiuussutissalertissimanissamik piumasaqaat atuutsiinnarneqarpoq

Kalaallit Nunaanni coronavirusimut atatillugu killilersuutigineqartoq kingulleq apriilip tallimaata tungaanut atuutttoq, 2022-mi juunip aappaanuugallartoq sivitsorneqarsimavoq. Killilersuut malillugu Kalaallit Nunaanni najugaqaratik tikittut coronavirusimut akiuussutissalerneqarsimanissaat piumasaqaataavoq.

Namminersorlutik Oqartussanit tusagassiorfitsigut nalunaaruteqarnermi ilisimatitsissutigineqarpoq, Nunatsinni tuniluuttoqalermat Naalakkersuisut tuniluuttoqarnera killilersimaarniarlugu suliniutigisimasaat maanna unitsittariaqalersut, tuniluuppallaartoqarunnaarsimanera pissutigalugu.

Ilaatigut ilisimatitsissutigineqarluni, Coronamik Akiuineq – Corona Bekæmpelsen, taamatut isikkoqartillugu pilersinneqarsimasoq 2022-mi juunip 30-ani matuneqassasoq naatsorsuutigineqartoq. Coronamulli atatillugu sianerfigineqarsinnaasoq ulluinnarni nal. 8.00-16.00 ammasasssalluni.

Nunatsinni nakorsaanerup Henrik L. Hanseni ukiuni marlunni corona atuutereersoq oqaatigaa, Kalaallit Nunaanni maanna tuniluuttoqarunnaartoq.

- Massakkuugallartoq tuniluuttoqanngilaq. Februaarimi tuniluuttoqarnerpaasimavoq, tassungalu atatillugu unitsinneqartut amerlisimallutik. Ullumikkut corona pissutigalugu uninngasoqanngilaq. Taamaammat tamanna nutaarsiassatsialaavoq, Henrik L. Hansen oqarpoq.

Kisitsisinik ullormut nutarterisoqartarunnaartoq

Nunami misissuisarfiit matuneqarput. Tamatuma kingorna PCR atorlugu misissortinniartut peqqinnissaqarfik aqqutigalugu misissortinnissamut inniminniisalissapput, inuillu nunamut tikinniartut PCR atorlugu misissorneqartarnissaat peqqinnissaqarfimmit isumagineqartalissalluni.

- Ulluinnarni paasissutissat nutaat nunatsinni nakorsaaneqarfimmit nalunaarutigineqartartut ullumikkumiit unitsinneqassapput. Sapaatip akunnera uani COVID-19 pillugu unitsitsisoqanngilaq misissortittullu aamma ikissimaqaat. Immikkut nutaarsiassaqassappat nittartagaq nutarterneqarumaarpoq, Namminersorlutik Oqartussat allapput.

Tuusintilikkaat tunillatsissimasut

2022-mi januaarip tungaanut PCR atorlugut kikkulluunniit misissortissinnaasimapput. Naalakkersuisulli PCR atorlugu misissuisarnermut malittarisassanik allanngortitsisimapput, inuit napparsimarujussualersinnaasut tassani salliutinneqalersimallutik. Nunatsinni Nakorsaaneqarfimmit ilisimatitsissutigineqarpoq, nunami inuit tuusintilikkaat coronavirsumik tunillatsissimasut misissuisarnertigut takutinneqarsimasoq.

- Tuniluunnerup ingerlanerani 2022 marsip naanerani PCR atorlugu misissortissimasunit 12.055 tunillatsissimasutut nalunaarsorneqarsimapput. Kisitsini taakkunani kisimi PCR atorlugu misissortissimasuupput, Namminersorlutik Oqartussat allapput.

Innuttaasut arlallit januaarimiilli coronavirusimik tunillatsissimapput. piumasaqaatilli allanngortinneqarmata PCR atorlugu misissorneqarsimanatik.

- Kisitsisit ataqatigiissaakkamik nalunaarsorneqarsimanngimmata tunillatsissimasut PCR atorlugu nalunaarsorneqarsimasut saniatigut annertunerungaatsiartumik tunillatsittoqarsimavoq. Nunatsinni nakorsaaneqarfiup missingersorpaa innuttaasut amerlanerpaartaat tunillatsissimassasut, oqaatigineqarpoq.

- Amerlanerpaartaat qaammatini kingullerni pingasuni tunillatsissimapput, tassani tunillaassuuttoq Omikron BA.2 annerpaajusimavoq.

191-it uninngasimasut - 21-t toqusimallutik

Ulloq 31. marts 2022 tikillugu inuit coronaviruseqarlutik uninngasimasut 191-iusimapput. Unitsinneqarsimasut 14 procentii corona pissutiginerullugu unitsinneqarsimallutik.

• 101-it Nuummi
• 20-t Sisimiuni
• 13-it Ilulissani
• 10-t Aasiaanni
• 9-t Qaqortumi
• 9-t Maniitsumi
• 8-t Nanortalimmi
• 6-it Upernavimmi
• 6-it Uummannami
• 5-it Paamiuni
• 3-t Narsami
• 1 Qasigiannguani

- 191-t unitsinneqarsimasut unitsinneqarnerminni agguaqatigiissillugu 52,7-nik ukioqarsimapput. Katillugit meeqqat 18-it inorlugit ukiullit 15-nit COVID-19 pissutigalugu unitsinneqarsimapput - COVID-19-millu peqquteqartumik unitsinneqarsimasoq ukioqqortunerpaaq 96-nik ukioqarsimalluni. Piffissami matumani arnat unitsinneqarsimasut 53 %-iusimapput, nunatsinni nakorsaaneqarfik allappoq.

COVID-19-eqarlutik imaluunniit COVID-19 peqqutigalugu 21-it toqusimapput. Toqusimasunit 47,6 %-it COVID-19 pingaarnertut toqqutigisimavaat.

Toqusimasut ukiusa agguaqatigiissinneri 80,3-nik ukioqarput, inuusunnersaq 68-nik ukioqarluni utoqqaanersarlu 92-inik ukioqarluni.

- 2021-mi juullip tungaanut tunillaassuuttoq Omikron takkummat tunillaassuunnerujussuaq aatsaat takkuppoq tunillaassuunnermilu kingunerluutit isumagisinnaasimavagut. Nunanut allanut sanilliullugu inuuneq tunillaassuunnerup ingerlanerani Nunatsinni nalinginnaanerusumik ingerlasimavoq, Namminersorlutik Oqartussat allapput.

Suli sukkut tamaana tunillaassuisoqartartoq oqaatigineqarpoq.

Naalakkersuisut inuit suli kaammattorusuppai coronavirusimut tamakkiisumik akiuussuseqqullugit, nunami ukiamut annertuumik tuniluuttoqarsinnaaneranut piareersimasoqarnissaa anguniarlugu.