Kunngikkormiut tikeraarnerat
Tikiffissaat kingulleq: Nuummut tallimanngorpat tikissapput
Kunngikkormiusut ataqqinassusillit Qeqertarsuatsiaaniipput marlunngormat, Nuummi pisortatigoortumik tikeraassapput tallimanngorpat
Kommuneqarfik Sermersooq kunngissakkunnut meeraannullu sisamanut sunik tunissuteqassava?
Meeqqallu kia krpnprinsesse Mary naasunik tunissavaa?
Kunngikkormiut Nuummut aggustip 8-ani ulloq naallugu tikeraarnissaat sioqqullugu apeqquterpassuupput.
Taamaattorli pisussanut pilersaarut annertooq inissittoq, kommunimi kulturimut tunngasuni siunnersorti, Julie Funch, oqarpoq.
- Taamaattorli nuannersunik tupaallaatissaqassaaq. Nipilersornerlu eqqarsaatigalugu oqaatigisinnaavara erinarsoqatigiinnik erinarsortoqassarlunilu nipilersortoqassammat. Kunngikkormiunillu tikeraartoqartillugu ileqqorineqartartut aamma attatiinnassavavut, siunnersorti erseqqissaavoq.
Borgmester Asii Chemnitz Narupip, tikeraat ippassaammat unnukkut kunngikkormiut umiarsuaannik Dannebrogimit tikissimasut, Nuutoqqami tikilluaqqussavai, kunngissakkullu pingasoriarluni hurraarutigineqassallutik.
Pisussat ilaattut rådhusi pulaarneqassaaq kommunalbestyrelsilu naapinneqassalluni, tamatumanilu ataatsimiittarfik eqqumiitsuliortup Hans Lyngep qalipagai malillugu ikaartittikkanik pinnersarneqarsimasoq, aaqqissuussinermut tulluartuussalluni.
Qarlortartartoq Arnannguaq Gerstrøm tamatumani erinniamik nutaamik kunngissakkannut qarlortarluni tusarnaartitsissaaq, kommunalbestyrelsimullu ilaasortap Per Berthelsenip ikaartitikkat pillugit atuakkiaq kunngissakkunnut tunissutigissallugu.
Ullormi tassani Inatsisartut Naalakkersuisullu aamma pulaarneqassapput, Issittumilu sakkutooqarfik Nuummi 2012-imi pilersinneqartoq aamma kunngikkormiunit pulaarneqassalluni.
Kunngikkormiut tikeraarnissaat pillugu pilersaarutit Nuuk Ugeavisimi atuarneqarsinnaapput. Aviisi akeqanngitsumik ataani aaneqarsinnaavoq: