Tikaagullittassat agguaanneqarnerat allanngortinneqarpoq
Nunatta Kitaani 164-it tikaagullittassiissutigineqarnikuupput. Pisasseeqqaarnermi tikaagulliit 110-it qamutilissortunut pisassiissutigineqarput, taamaattorli maannamut 27-iinnaat pisarineqarsimapput, illuatungaanilu qoorortoorsortunut 54-init maannanut 31-it pisarineqariikatapput, taamaammat aalisarnermut pininiarnermullu naalakkersuisoq pisassiissutit agguarneqarnerannik allanngortitsivoq.
Aalisarnermut piniarnermullu naalakkersuisoq aalajangerpoq Kitaani qamutilissortunut tikaagullittassanit 41-it qoorortoorsortunut nuunneqassasut.
Taamaalilluni tikaagullittaassat 83-it qamutilissortunut sinnerupput 88-illu qoorortoorsortunut sinnerullutik, pisassiissutillu agguaanneqarnerisa allanngortinneqarnerat 23. august 2023-mi atuutilissaaq, taamak ilisimatitsivoq aalisarnermut piniarnermullu naalakkersuisoqarfik.
- Pisassiissutit allanngortinneqartarnerat ukiut tamaasa pisarpoq pisassiissutit sapinngisamik annerpaamik atorluarneqarsinnaaqqullugit, tassani pissutaanerpaasarpoq nunatsinni sumiiffinni arlalissuarni qamutilissorlutoqanngimmat, taamaammallu pisassiissutit tamakkerlugit pisarineqarsinnaaneq ajormata, aalisarnermut piniarnermullu naalakkersuisoqarfimmi immikkut siunnersorti, Masaana Dorph Sermitsiaq.AG-mut oqarpoq.
Kommunit nalunaarnissaat utaqqineqassaaq
Nuussinissamut ulluliussaq sioqqullugu, tassa augustip 22-iani (ullussaa kommunit namminneerlutik aalajangissavaat) ataatsimoorluni piniarneq tamarmi inerteqqutaavoq. Kommunit nutaamik agguaasseqqinneq tamanut nalunaarutigereerpassuk piniarneq aatsaat aallarteqqinneqarsinnaavoq.
Piniaqatigiit qoorortuumik tikaagullinniartut apriilip 1-iannit oktobarip 31-at ilanngullugu 2023-mi piniarsinnaapput, qamutilissortut ukioq naallugu piniarsinnaasut.
Tunumi pisassiissutit tamakkerlugit 20-upput aamma 2022-miit nuussat sisamaapput.
Aggustip 17-anni 2023-mi killiffittut paasissutisiarisai naapertorlugit Kitaani tikaagulliit 31-t ataatsimoorluni piniarnermi aamma qamutilinnik tuukkartalinnik piniarnermit tikaagulliit 27-it pisarineqarsimapput.
Tunumi tikaagulliit tallimat pisarineqarsimapput, pisassiissutinik 16-it sinnerullutik.
Malittaani kisitsisit tassaapput qamutilissortuniit umiatsiaararsortunut agguaateqqitat, taannalu isumaqarpoq ukiumoortumik pisassat decembarip 20-ani 2022-mi agguaanneqareersut allanngortinneqanngitsut, taamak ilisimatitsivoq aalisarnermut piniarnermullu naalakkersuisoqarfik.
