Tik Tokimi nakuuserneq pillugu immiussaq siammarterneqartoq
Oqartussat arlallit inuit attaveqaqatigiittarfiisigut siammarterneqartoq mianersoqqussutigivaat, angajoqqaanullu kaammattuutigalugu qitornamik inuit attaveqaqatigiittarfiinik atuinerannik immikkut malinnaassasut.
Maannakkorpiaq inuit attaveqaqatigiittarfianni Tik Tokimi nakuuserneq pillugu immiussaq siammarterneqarpoq. Tamanna politiinit suliniaqatigiiffinnillu ernummatigineqarpoq. Taakku angajoqqaanut kaammattuutigaat, meeqqamik inuit attaveqaqatigiittarfiinik atuinerannik eqqumaffiginnissasut.
Inuit attaveqaqatigiittarfiini sammineqartut meeqqat inuunerannut ajorluinnartumik kinguneqarsinnaasut, politiinit mianersoqqutigitigineqarpoq.
- Inuit attaveqaataanni sakkortusaarneq interneternerup avataani pinerlunniarnermut allatulluunniit akornutaasumik pissusilersornermut aqqutaasinnaasarpoq, assersuutigalugu nakuusernerit imminullu toqunnerit inuit attaveqaataanni aallartittumik pissusilersornermit pissuteqarsinnaasarput. Taamaattumik meeqqat inuit attaveqaataanni ajutooriataarnissamut piartuaarnerat ilungersunartorujussuartut isigaarput, Kalaallit Nunaanni Politiini Pitsaaliuinermut Misissueqqissaarinermullu immikkoortortami pisortaq, Mikkel Høj Svendsen, oqarpoq.
Videot sukkasoorujussuarmik siammarterneqartut qinngasaarinermik kinguneqarsinnaapput.
Tusaannga
Ikiorneqartariaqaruit oqaloqateqarnissamilluunniit pisariaqartitsiguit taava Tusaannga oqarasuaatikkut ugguuna attaveqarfigiuk: 801180 imaluunniit SMS-ikkut 1899.
Ammasarfiit:
Ataasinngorneq-Sisamanngorneq nal. 09:00 – 22:00
Tallimanngorneq nal. 09:00 - 04.00
Arfininngorneq nal. 16:00 – 04:00
Sapaat nal. 16:00 – 22:00
Pissusilersortarneq ernumanartoq
Paarisamit ilaatigut angajoqqaanut kaammattuutigineqarpoq, meeqqamik killiliisinnaanerannik ilinniartitsinissaq, aamma inuit attaveqaqatigiittarfiinik. Videommi meeqqat akunnerminni pissusilersuutigisartagaannut tamanna kingunerlussinnaammat, Paarisa ilisimatitsivoq.
-Inuit attaveqaataat meeqqat inuusuttuaqqallu imminnut ajoqutaasumik unammillerlutik pissusilersornerulernerannut atorneqarnerat ernumanartutut isigaarput. Unammillinngikkaanni ataatsimoorfimmit peersitaanermik kinguneqarsinnaavoq. Taamatut ataatsimoortut tatisinerat angajoqqaat immikkut eqqumaffigissavaat aammalu qitornatik tamakku pillugit oqaloqatigalugit, Paarisami immikkoortortaqarfimmi pisortaagallartoq, Tina Evaldsen oqarpoq.
Angajoqqaat pingaarutilimmik inissisimasut
Meeqqat inuit attaveqaqatigiittarfiisigut pissusilersornissaannut angajoqqaat sinaakkusiisinnaapput. Taamaammat angajoqqaanut kaammatuutigineqarpoq, meeqqamik killiliisarnissaannik ikiueqqullugit aamma meeqqamik inuit attaveqaqatigiittarfiinik atuisarnerannik soqutiginninneroqqullugit.
PiSiu-p angajoqqaanut siunnersuutai:
- Soqutiginninnerit takutiguk – aamma qitornat inuusuttuaranngoraangat
- Killiliigit malittarisassiorlutillu – sunalu pissutaanersoq nassuiarlugu
- Qitornavit internetsernissamut malitarisassat unioqqutippagit sakkortuallaamik qisuariarnak
- Inatsisinik internetikkullu pitsaasumik pissusilersornernik meeraq ilinniartiguk