Tiinganiartoqarsimaneranik 2019-imi oqariartortoq qisuariarfigineqanngitsoq

Peter Grønvold Samuelsenip KNI A/S-imit pisortaanertut tunuarnissaa sioqqullugu tiinganiartoqarniartarsimaneranut tunngatillugu paasissutissat nutaat pissutigalugit siulersuisuunerni siulittaasoq Lars Borris Pedersen suliamut akulerunneqarsimavoq. Siulersuisuunerni siulittaasup itigartippaa tiinganiartoqartarneranut tunngatillugu pisortaanerup tunuarnissaani ukiut marluk sioqqullugit ilisimasaqarsimanini.

KNI-mi sulisuusimasoq Anemarie Schmidt Hansen Sermitsiaq.AG-mut maanna oqaluttuarpoq nunatsinni suliffeqarfiit annersaat ilaanni, KNI A/S-imi, kinguaassiuutitigut kannguttaatsuliorluni tiinganiartoqartarsimaneranik unitsitseriaasimagaluarluni iluatsinngitsumilli.

Ukiut marluk matuma siorna – 2. februar 2019 - Anemarie Schmidt Hansen kinaassutsiminik isertuussillunni arnat suleqatini arlallit sinnerlugit Naalakkersuisut Siulittaasoqarfianni Siulersuisuunerit allattoqarfiannut nalunaaruteqarpoq kissaateqarluni pisortaanerup pissusilersuutaanik unitsitsisoqassasoq.

Ilungersorujussuarneq

Sulisut ilungersunartorsiorujussuarput iliuusissaaruteqqallutillu, Anemarie Schmidt Hansenilu pisortaanermit suneqarsinnaasimanngilaq suliffimmit soraareersimagami Nuummullu nuussimalluni.

Anemarie Schmidt Hansen qanoq iliuuseqassalluni aalajangerpoq. KNI-mmi qitiusumik allaffeqarfiani Sisimiuniittumi ukiuni arlalinni atorfeqarnermini ilisimalluarpaa Peter Grønvold Samuelsen qanoq iliortarnersoq.

- Siulersuisuunerit allattoqarfianni immikkoortortaqarfimmi pisortaq Lars Balslev allaffigaara, taassumallu siulersuisuunerni siulittaasumik Lars Borris Pederseninimik ataatsimeeqateqarnissara aaqqissuuppaa, Anemarie Schmidt Hansen oqaluttuarpoq.

- Qitiusumik allattoqarfimmi pissutsit qanoq ajorluinnarnerannik Lars Balslev aamma Lars Borris Pedersen ilisimatinneqarput. Paasitinneqarput pisortaaneq killissamik qaangiilluni tiinganiartartoq, Anemarie Schmidt Hansen ilisimatitsivoq.

Nikalluallannartumik kinguneqarpoq

Qitiusumik allaffeqarfimmi sulisunut nalunaaruteqartuusumullu ataatsimiinnerup kingunera nikalluallannarpoq.

- Aprilimi 2019-imi Lars Borris Pedersenimit saaffigineqarpunga. Taanna oqaluttuarpoq qitiusumik allattoqarfimmi sulisut ajunngilluinnartut, aammalu susoqarsimanngimmat suliassaqanngitsoq, Anemarie Schmidt Hansen oqaluttuarpoq.

Taama nalunaarfigitereerluni KNI-mi suleqatigisimasani attaveqarfigai paasiniaalluni siulersuisuunerni siulittaasumik oqaloqateqarsimanersut.

- Tamarmik oqaluttuarput misissuinermut sumulluunniit peqataatinneqarsimanatik, Anemarie Schmidt Hansen oqarpoq. Taanna pakatsisimavoq suliaq pimoorunneqarsimanngimmat.

Pinngitsoortinneqarsinnaasimagaluarpoq

- Ukiut marluk qaangiussimalerput, arnallu allat aamma pinerlineqarsimallutik. Politiinut nalunaarutiginnittoqarsimanera takussutissaaginnarpoq suliassamik politiinut tunniussaqartoqarnissamut peqqutissaqarsimammat. Susoqartannginneranut pissutaasunut ilaavoq Inatsisartunut qinigassanngortillunga sassarama, Anemarie Schmidt Hansen nassuiaavoq.

Suliniutissanut pingaarnernut ilaalluinnarpoq kinaassutsimik isertuussilluni nalunaaruteqartarsinnaanerup namminersorlutik oqartussani suliffeqarfinni tamani atuutsilernissaa, saaffiginnissutillu pimoorunneqartarnissaat kiisalu immikkut ilisimasalinnit suleqatigiinnit saaffiginnissutit suliarineqartarnissaat.

- Inuiaqatigiinni ikittunnguuvugut, arnallu killissamik qaangiiffigitillutik tiinganiarfigitittarnerat unittariaqarpoq. Suliassat taama ittut suulluunniit, arnap qanoq inissisimanera akissaateqarneralu aallaaviginagit pitsaasumik suliarineqarnissaanut qularnaveeqqusertariaqartut isumaqarpunga, Siumut sinnerlugu qinigassanngortittoq oqarpoq.

Borris: Paasissutissat kukkuneqarput

Sermitsiaq.AG-p Lars Borris Pedersen aperaa 2019-imi ilisimatinneqaqqaaramili suliamik sooq misissuititsilluni qulaajaasimannginnersoq.

- Apeqqutigisanni paasissutissatut tunngavilersuutigisatit arlaqartut kukkuneqarput, imaluunniit uanga ilisimasaqarfiginngiinnarpakka. Paasissutissat tunniussatit misissussavakka. Siulersuisuni ilaaninni arlaleriarluta sulisut qanoq innerinik misissuititsisarsimavugut, akissuteqartut kinaassutsiminnik isertuussillutik akisarlutik. Kingullermik taama misissuititsisoqarpoq 2020-mi, Lars Borris Pedersen allakkatigut akissuteqarluni allappoq. Taassuma KNI-mi pisortaqarfimmut, aqutsisunut sulisunulluunniit qanoq attaveqartoqarsimanersoq oqaaseqarfigiumanngilaa, sulisut innimigineqarnissaat pissutigitillugu.

Siornatigut saqqummereersimavoq

Anemarie Schmidt Hansen Dorthea Olsen Rasmussen peqatigalugu, immikkut siunnersorti Hans Peter Lynge-Larsen sinnerlugu KNI A/S-ip naatsorsuutinik allanngortitsisimanera pillugu Sermitsiami saqqummereersimavoq.

Suliaq uissuumminartoq pissutigalugu KNI-mi siulersuisut Deloittemik misissuititsipput kingornalu aalajangerlutik suliffeqarfiup nammineq aningaasaatai 50 milliuunit koruuninik ikilisinneqassasut.

Politikkikkulli tatineqarneq aatsaat pilermat qulaajaasoqarnissaa aalajangiunneqarpoq. Misissuinerulli inerneri suli saqqummiunneqaratik.

Siulersuisuunerit allattoqarfianni immikkoortortaqarfimmi pisortaq Lars Balslev Sermitsiaq.AG-p apeqqutaanut akisimanngilaq. Ilaatigut apeqqutigineqarpoq siulersuisuunerni siulittaasoq suli tatigineqarnersoq.

Powered by Labrador CMS