Tigusarineqartumut ataataasoq: Ernera kommunimit sumiginnarneqarpoq
Orla Dalagerip, angummut 36-nik ukiulimmut ataasinngornermi unnukkut politiinut sioorasaarisimasutut tigusarineqartumut ataataasup, kommuni angummik ADHD-eqartumik ikiuisimannginngitsutut isornartorsiorpaa.
Ippassaq ataasinngornermi Orla Dalagerip ernerata 36-nik ukiullip ullua ajorluinnartumik inerneqarpoq.
Angutip angerlarsimaffimmini imminut mattulluni angajoqqaani politiillu sioorasaarsimavai. Politiit naggataatigut aqqusineq assersoriarlugu angut ataasinngornermi unnukkut nalunaaqutaq 21.30 tigusaraat.
Pisup aqanguani angutip ataataata Orla Dalagerip oqaluttuaraa, ernertik maannakkut 36-nik ukioqartoq eqqortumik ikiorserneqarsinnaaqqullugu ilaqutariit kommunimut arlaleriarlutik saaffiginnittarsimasut.
- Isumaqarpunga angut inersimasoq ADHD-eqartoq kommunip qanoq ikiorsinnaanerlugu nalugaa. Aamma isumaqarpunga kommunimi sulisut suliassaminnik naammassinnissinnaanngitsut, Orla Dalager Sermitsiaq.AG-mut oqarpoq, nangillunilu:
- Kommunimut saaffiginnittuaraluarluni susoqarneq ajornera nukillalaarnarlunilu qasunarpoq.
Taassuma oqaluttuaraa, ernermi sullissisuinut arlalinnut saaffiginnilluni ernermi ikiorneqarnissaanik tapersersorneqarnissaanillu qinnuiginnittarsimalluni.
- Ernivit kommunimit qanoq ikiorserneqarsinnaanera takorloorpiuk?
- Ulluinnarni ajunngitsumik inuuneqassappat pisariaqartitaatigut tapersersorlugu ikiorserneqartariaqaraluarpoq, Orla Dalager akivoq.
Toqqissisimasumik meeraasimasoq
Orla Dalagerip oqaluttuaraa, ernini asaneqarluarluni aalajangersimasunillu atugassaqartinneqarluni toqqissisimasumik meeraasimasoq.
Inuusuttuulluni Danmarkimut nuuppoq, Danmarkimiinnerminilu sakkortuumik misigisaqarpoq, kingusinnerusukkullu annertuumik ADHD-eqartoq paasineqarluni. Ukiut aqqanillit matuma siornatigut angajoqqaaminut uterluni angerlarpoq, tassanilu ajornartorsiutai annertusingaatsiarlutik.
- Ajoraluartumik taamatut aatsaat sioorasaalinngilaatigut. Arlaleriarluta unnukkut unnuakkulluunniit allanukartariaqartarsimavugut, naassaarinnginniassammatigut. Ippassarli killissani tikissimagaa misigisimavunga, taamaammallu sioorasaarinera politiinut nammineerlunga nalunaarutigisimallugu, Orla Dalager oqaluttuarpoq.
Orla Dalagerip, ernermi ukiut aqqanillit matuma siornatigut Kalaallit Nunaannut utermalli, taperseeqqusilluni ikiorseeqqusillunilu kommunimut saaffiginnittarnerpassuit kinguneqarneq ajornerat nukillalaarnarnerarpaa.
- Oqartussanit sumiginnagaavoq. Uanga angajoqqaatut ilaatigut aningaasatigut ikiorsertariaqartarpara, nerisaqarniassammat. Oqaatigisariaqarparalu suli ajornerusumik pinerluuteqannginniassammat ikiortarlugu, taanna oqarpoq.
- Kommuni innuttaasunik sanngiinnerusunik ikiorsiinissamut pisussaaffeqarpoq. Kommunillu iliuuseqarluni innuttaasut tarnikkut napparsimasut ajunnginnerusumik inuuneqarnissaat anguniarlugu ikiortariaqarpai.
Kommuni suliamut pineqartumut oqaaseqarsinnaannginnerarpoq. Sermitsiaq.AG-mit inersimasunut ADHD-eqartunut periarfissat neqeroorutillu pillugit oqaaseqartitsiniartoqarpoq.