Tigusarineqartoq ataaseq: Ilulissani aallaasersortoqarsimasoq
Ilulissani illoqarfiup qeqqani, arfininngornerup ullaassaani aallaasersortoqareersorlu inuk ataaseq tigusarineqarpoq. Inatsisilerituut suliamik nalileereerpata inatsit tunngaviusoq naapertorlugu killisiorneqassanersoq nalilerneqarumaarpoq.
Ilulissani innuttaasut arlallit politiinut arfininngornerup ullaasaani siarngupput nalunaarutigalugulu inuk illoqarfiup qeqqani aallaaseqarluni ingerlasoq, illoqarfiullu immikkoortuanut Atersuup tungaanut ingerlasoq. Inuk ingerlasoq aallaaseqarpoq.
- Arlallit nalunaarutiginnipput nal. 05.00 missaani. Innuttaasut oqaluttuarput inuk aallaaseqarluni illoqarfiup qeqqatigut ingerlasoq. Aamma aallaasoqarsimaneranik ilisimatinneqarpugut, pigaartut pisortaat Preben Kleist Sermitsiaq.AG-mut oqaluttuarpoq.
Nalunaarutiginnittoqareernerup kinguninngua inuk tigusarineqarpoq, sulilu tigummineqarluni.
- Pineqartoq sivisunerusumik tigummigallarneqarnissaa pillugu inatsit tunngaviusoq naapertorlugu killisiorneqassanersoq, inatsisilerituut nalilersussavaat. Suliami suli misissuigatta annertunerusumik oqaaseqarsinnaanngilanga, Preben Kleist oqarpoq.
Pisumi inunnik ajoqusertoqarsimanngitsoq, politiit nalunaarutigaat.
Takunnissimasunik ujaasisut
Innuttaasut arlallit nalunaarutiginnereeraluartut, taamaattoq Kalaallit Nunaata Politiivi takunnissimasinnaasunik ilisimannittunilluunniit suli oqaloqateqarumapput.
- Takunnissimasinnaasut, pisumilu ilisimasaqarsinnaasut oqaloqatigerusuppagut, pigaartut pisortaat oqarpoq.
Innuttaasut takunnissimasut tusaasaqarsimasulluunniit, imaluunniit pisumi susoqarsimaneranik ilisimannittut, Kalaallit Nunaata Politiivini pigaartunut, 70 14 48-mut sianeqquneqarput.