Tigusarineqarsimasut marluk toqutsisimasutut unnerluutigineqassasut
Politiit inuit marluk Qaasuitsuop Eqqartuussivianut sassartinneqassasut naatsorsuutigaat, Ilulissani inuup timaata ilaanik nassaartoqarneranut atatillugu toqutsisimasutut unnerluutigineqassallutik.
Ilulissat ikuallaaviani inuup timaata ilaanik nassaartoqarneraniit sapaatip akunnera qaangiuttoq, inuit marluk Ilulissani eqqartuussivimmi toqutsisimasutut unnerluutigineqarlutik politiinit ullumi kingusinnerusukkut sassartinneqassapput.
Vicepolitiinspektøri Jan Lambertsen Sermitsiaq.AG-mut taamatut ilisimatitsivoq.
- Eqqartuussivimmut sassartitsinissamut piffissaliinissaq maannakkorpiaq utaqqivarput, Jan Lambertsen arfininngornermi ullup-qeqqata siornatigut oqarpoq.
Taassuma inuit marluk taakku angutaanersut arnaanersulluunniit imaluunniit qassinik ukioqarnersut oqaatigisinnaanngikkallarnerarpaa, inuilli taakku marluk Ilulissani najugaqartuunerarlugit.
Politiit toqutaasimasup kinaanera maanna qularutigiunnaarsimavaat, naak kinaanera pisortatigoortumik suli saqqummiunneqanngikkaluartoq. Jan Lambertsenip ilisimatitsissutigaa, pineqartup ilaqutai ilisimatinneqarsimasut.
Takussutissat innuttaasullu saaffiginnissutigisimasaat iluaqutaasimasut
Ilulissani sapaatip akunnerani, pingaartumik illoqarfiup ikuallaaviani misissuisoqareersoq inuit taakku marluk eqqartuussivimmut sassartinneqartussanngorput. Ikuallaavimmi inuup timaata ilaanik allanik nassaartoqaqqissimavoq, politiillu naapertorlugit takussutissanik allanik aamma soqutiginartoqarpoq.
Vicepolitiinspektørip oqaatigaa, ikuallaavimmi takussutissat nassaarineqartut innuttaasullu saaffiginnissutigisimasaat ikiortigalugit pinerluuteqarsimasutut pasineqartut assaarineqarsimasut:
- Takussutissat innuttaasullu saaffiginnissutigisimasaat ikiuutaalluarsimapput.
- Taakku malitsigisaannik tigusarinnissinnaasimavugut, Jan Lambertsen oqarpoq.
Vicepolitiinspektørip neriuutiginerarpaa, Ilulissani suliaq amiilaarnartoq innuttaasunik toqqissisimajunnaartitsisimasoq tigusarinnittoqarneratigut toqqissisimasoqaqqilerumaartoq.