TIG: Attuumassuteqarpallaarneq ammasumik misissorneqassaaq

Transparency international Greenland attuumassuteqarpallaarneq pillugu suliani ammasumik ingerlatsisoqartarnissaanik piumasaqarpoq. Inuiaqatigiinnut aammali suliami pineqartunut paasiuminarnerussammat.

Transparency Greenlandimi siulittaasup tulliata Anita Hofferip, Naalakkersuisut Siulittaasuat Kim Kielsen nipisattassanik qaffaanermut atatillugu attuumassuteqarpallaarsimanersoq oqaaseqarfigerusunngilaa.

- Sammineqartoq malinnaaffigisimavarput, attuumassuteqarpallaartarnermullu tunngassuteqartunik nalinginnaasumik oqaaseqarsinnaavunga, taanna Sermitsiaq.AG-mut oqarpoq.

TIG-imit sulianut ataasiakkaanut oqaaseqarusutannginnermut pissutaavoq, suliani pineqartuni suut pissusiviunersut misissornissaannut naammattunik sulisussaqannginnerput, siulittaasup tullia nassuiaavoq.

- Tusagassiorfinnit paasisatta saniatigut ilisimasaqarnerunngilagut. Taamaammat nukittunik tusagassiorfeqarnissarput illersortarparput. Taakkumi pissutsinik eqqunngitsunik saqqummiussisartuupput, Anita Hoffer oqarpoq.

Ammasuuneq tamanut pitsaanerpaasoq

Taassuma erseqqissaatigaa, suliamut attuumassuteqartut tamarmik sapinngisamik ammasumik ingerlatsisoqartarnissaa soqutigisarissagaat.

- Pineqartup soorunami oqaluuserineqartoq ilumoornersoq misissortissallugu soqutigisariaqarpaa. Suliani sapinngisamik ammasumik ingerlatsisoqartarnissaanik nilliaateqaannarsinnaavugut. Pæisut misissorneqalik, soorunami misissuisoqassasoq misissuisoqartariaqartorlu isumaqarpugut, taanna oqarpoq.

Pasitsaassisoqarsimappammi suliaq misissorneqartussaavoq, tassanilu suliamut attuumassuteqartut tamarmik akuleruttussaanngillat.

- Attuumassuteqarpallaarsorinnittoqarpat, inuk pineqartoq tunuassaaq. allallu attuumassuteqarpallaartoqarnersoq akerlianilluunniit pisoqarnersoq nalilersussavaat, siuittaasup tullia erseqqissaavoq.

Transparency International Greenland sapaatip akunnerani matumani nutaamik siulittaasoqalerpoq, Birita í Dali, taanna Aalisarnermut, Piniarnermut Nunalerinermullu Naalakkersuisoqarfimmi immikkut siunnersortaammat, pineqartoq pillugu kattuffimmi alla oqaaseqartinneqarpoq. Sermitsiaq.AG-mit taamaammat siulittaasuujunnaartoq maannalu siulittaasup tullia Anita Hoffer oqaloqatigineqarsimapput.

Powered by Labrador CMS