Thule tikeqqusaanngilaq: Coronamik tunillatsissimasut marluk
Misissortinnerit marluk aallaavigalugit Thule Air Basemi Covid-19-imik napparsimallutik tunillatsissimasut marluk paasineqarput. Tunillaassuuttoqalinnginnissaa anguniarlugu nappaalanersuaqartoqarneranut ataatsimiititaliaq aalajangerpoq juunip aallaqqaataata tungaanut Thulemut tikittoqaranilu Thulemit aallartoqassanngitsoq.
Nunatsinni coronavirusimik tunillatsissimasoqaqqilerpoq.
Thule Air Basemi inuit marluk Covid-19-imik tunillatsissimasut sisamanngormat paasineqarpoq. Tunillatsissimasut tamarmik mattusimaneqalereersut, politiit ilisimatitsipput. Nappaalanersuaqarneranut ataatsimiititaliap nalunaarutaa politiinit ingerlateqqinneqarpoq.
- Siulleq USA-mit toqqaannartumik Thulemut 6. maj tikippoq ullunilu arfineq-marlunni mattusimasimalluni. Mattusimareernermi misissortinnermi paasineqarpoq pineqartoq tunillatsissimasoq. Pineqartoq allanut attaveqarsimanngilaq.
- Aappaa Danmarkimiit Kangerlussuatsigoorluni 29. april tikippoq. Tikinnerminit ullut arfineq-marluk mattusimareerluni misissortikkami Covd-19-imik tunillatsissimanngitsutut paasineqarpoq. Kingornali Covid-19-imut ersiuteqalerami misissorteqqippoq, 13. majilu paasineqarluni tunillatsissimasoq, ilisimatitsissutigineqarpoq.
Sulisimavoq
Danmarkimiit Kangerlussuatsigoorluni Thule Air Basemut tikittoq ulluni arfineq-marlunni siullerni mattusimareernermini, misissorteqqaareernermilu kingorna sulisimavoq. Aappassaanilli misissortikkami tunillatsissimasoq paasineqarmat attaveqarfigisimasai misissortittariaqalersimapput. Nappaalanersuaqarnerani ataatsimiititaliarsuup ilisimatitsissutigaa inuit 20-25-t missaanniittut misissortikkamik tamarmik tunillatsissimanngitsut paasineqartoq.
Tikittoqassanngilaq
Tunillaassortoqalinnginnissaa pillugu Nappaalanersuaqarnerani ataatsimiititaliaq aalajangerpoq Thulemit Thulemullu 1. juni tungaanut angalasoqassanngitsoq.
- Innuttaasut Kalaallit Nunaanneersut Pituffik/Thule Air Basemut 1. juni 2021 tungaanut tikeqqusaajunnaarput. Kangerlussuartigoorlutik suliartortussat suli tikissinnaassapput. Ilanngullugu Thulemiit Kalaallit Nunaanni inoqarfiusut angalanerit tamarmik 1. juni 2021 tungaanut inerteqqutigineqalerput, ilisimatitsissutigineqarpoq.