Folketingimut qinersineq
Thorning tunuarpoq
Thorning Folketingimut qinersisoqarnerani Socialdemokratit siulittaasuattut siullermeerluni siuariarpoq. Kisianni saamerliit ataatsimoortumik ajorsarnerat tunngavigalugu siulittaasutut tunuarpoq
Socialdemokratit taasinerit 26,3 procentiinik taaguunneqarlutik Folketingimi partiini anginerpaanngorput 47-nillu ilaasortaatitaqalerlutik.
Pissaaneqarneq inuulluaqqugaa
Partii 2001-imi qinersinerup kingorna aatsaat taama angusarissaartigaaq, tamatumali peqatigisaani naalakkersuisuutitaqarneq inuulluaqqusariaqalerlugu SF aamma De Radikale kinguariarujussuarmata.
- Helle Thorning-Schmidtip ukiuni qulini siulittaasuunermini siullermeerluni partiip siuariarneranik qulakkeerinninnera, tamatumali peqatigisaanik ministeriunertut inissisimanerminik annaasaqarnera, imminnut assortuupput, aviisimi ullormut saqqummersartumi Informationimi politikkikkut aaqqissuisoq Casper Dall oqarpoq.
Ajorsarnini nassuerutigigaa
Helle Thorning-Schmidtip oqalugiarnermini ajorsarnini nassuerutigaa, tamatumanilu siulittaasutut tunuarnissani aamma aalajangiussimallugu oqaatsit uku atorlugit "Sapinngisamik pitsaanerpaamik iliuuseqarniarsimavunga".
2005-immi qinersinerup kingorna Socialdemokratinut siulittaasunngorpoq, tamatumani partii Mogens Lykketoft Anders Fogh Rasmussenimut unammillertaasoq siuttoralugu taasinerit 25,8 procentiinik pissarsimmat.
Partii ukiut marluk affarlu qaangiummata Thorning siuttoralugu taasinerit 25,5 procentiinik pissarsivoq. Taamaattorli nalunaarpoq, "Fogh suli ajorsartissinnaagini" siulittaasutullu inissisimaannarluni.
Naalakkersuisut
Ukiut sisamat qaangiummata naalakkersuisuutitaqalerpoq, naak partii taasinerit 24,8 procentiinik pissarsilluni kinguariaraluartoq, taamanimiillu ministeriunertut piffissaq assoralisimaarfiusoq aqqusaarlugu inissisimalluni, partii naalakkersuisooqataasimasoq SF naalakkersuisunit tunuarmat.
Thorning maanna siuariarpoq, taamaakkaluartorli ministeriuneqarfimmut matuersaatit tusaamasaasut talerperlernut tunniuttariaqalerlugit.
Socialdemokratit tamatuma kinguneranik aamma nutaamik siulittaasortaasortaartussanngorput naalakkersuisunngortunut talerperlernut unammillersinnaasumik.
Taanna tassaasinnaasoq Mette Frederiksen maannakkorpiaq ilimanaateqarluinnarpoq, taannalu Socialdemokratinit nuimasunit arlalinnit tapersersorneqarpoq.
/ritzau/
Aamma atuaruk: Danmarkimi taasinerit tamarmik kisinneqareerput