Thomsen: Kielsen-ip sianerfigivaanga

Demokraatit siulittaasuata, Niels Thomsen-ip Sermitsiaq.AG-mut uppernarsarpaa Kim Kielsen-imit attavigineqarsimalluni, taamaakkaluartorli Thomsen-ip pisut eqqissilluni tiguai; naatsorsuutigineqassanngilaq partiip naalakkersuisooqatigiinnut kivisimasunut annaassiniartussatut isumalluutaanissaa.

- Siulliullugu oqaatigissavara naalakkersuisooqatigiit maanna ajalusoortut inuiaqatigiinnut qanoq aqqusaagaqartitsinerat assut ajuusaarutigigakku, tassami qaammatit tallimaannaat matuma siorna naalakkersuisooqatigiileraluarput, taamaammat aamma nunatta tutsuiginassusaata tatiginassusaatalu innarlerneqarnera qularutissaanngilaq. Aappaattut ilumoornerassavara, Kim Kielsen-imit saaffigineqarama, kisiannili oqaloqatigiinnerput qalliinnarsiorfiuvoq tigussaasunik imaqarani, Demokraatit siulittaasuat Niels Thomsen oqarpoq.

Niels Thomsen-ip erseqqissaatigaa naalakkersuisooqatigiit ajalusoorneranni parteertik arlaannaatigulluunniit annaassiniartussaannartut naatsorsuutigineqassanngitsoq, tassa naalakkersuisooqatigiinnissaq piinnarlugu naalakkersuisooqataalernaviaratik, taamaammallu naatsorsuutigigini Kielsen politikkikkut anguniakkanut tunngatillugu Demokraatinut nassueruteqassasoq.

- Isumaqatigiinniarnerni Kielsen-ip pingaartillugit anguniakkavut itigartitsissutigai, ilaatigut ilinniartitaanermut tunngasutigut, akileraartarnermut tunngasutigut, inuussutissarsiornermut tunngasutigut, tassanilu ingerlatseqatigiiffiit akileraartarnerannut tunngasutigut piumasaqaativut itigartitsissutigineqarput. Tamatuma malitsigisaanik isumaqatigiinniarnernit tunuassalluta aalajangerpugut, taamaammat ilumut Kielsen-ip kissaatigiguniuk naalakkersuisooqatigiilersinnaanissaq pillugu uagutsinnut aammalu politikkikkut anguniakkatsinnut tunngatillugu naaperiaassuteqartariaqarpoq, aatsaat tamanna pippat naalakkersuisooqatigiilersinnaaneq eqqartueqataaffigerusussinnaavarput, Niels Thomsen (D) nassuiaavoq.

Aammali nunatta aqunneqarnera ataatsimut isigalugu qanoq ingerlanneqartariaqarnersoq Thomsen-ip pingaartillugu oqaaseqarfigaa.

- Naalakkersuisut siulittaasuat ataatsimoorfiulluni iliuuseqarsinnaassuseqarnerminik takutitsisinnaasariaqarpoq, nunatta aqunneqarnera pillugu erseqqissumik siunnerfilersortariaqarpoq, tassami arlaannaannulluunniit iluaqutaanngilaq pisut qaangiataaginnarlugit ingerlatsiniarsarineq, taamatut ingerlatsisoqassappat tamanna innuttaasunut sumiginnaaneruvoq, Niels Thomsen (D) tikkuaavoq.

Aperineqarami aqagu Kalaallit Nunaata Danmarkillu akornanni attaveqaqatigiinnikkut inerisaanissaq pillugu isumaqatigiissummik atsioqatigiittoqarniarnera qanoq isumaqarfigineraa, Thomsen akivoq:

- Manna tikillugu isumaqatigiissutiginiarneqartoq takunngilarput, taamaalillutalu isumaqatigiissutiginiarneqartup imarisaa naluarput aamma naluarput allat aningaasaliiumasinnaasut danskit naalakkersuisuisut aningaasaliisinnaanissaminnut periarfissinneqarsimanersut, taamaattumik massakkoqqissaaq akisinnaanngilanga isumaqatigiissutiginiarneqartoq peqataaffigisinnaanerlutigu, taamaattorli erseqqissaatigissavara mittarfissualiornissanut pilersaarut tamakkiisumik peqataaffigissavarput, taamaattorli aningaasaleeqataajumasinnaasunik immikkoortitsisoqannginnissaa aamma pingaartipparput, Demokraatit siulittaasuat, Niels Thomsen Sermitsiaq.AG-mut oqarpoq.

Powered by Labrador CMS