Thomsenip inuppalaartumik politikerinut attaveqarsinnaaneq maqaasivaa

Mike Fencker Thomsen Kalaallit-Nunaanni eqqumiitsuliortunut pikkorinnerpaanut akuuinnarani aammattaaq uummamioqarpoq. Taamaattumik Kalaallit Røde Korsiata Inuusuttunut ingerlassata INUA-ta isiginnaagassialiaa tapersersorniarlugu aaliangersimavoq.Isiginnaagassiami sammineqarpoq meeqqat inuusuttullu Kalaallit-Nunaanni qanoq ajornartorsiortigisut.

- Mike Fencker Thomsen, nassuiarsinnaaviuk KRK-Inuata videoliaani peqataajumallutit sooq akuersaarsimallutit?

- Pingaaruteqarpoq uattut ittut tusagassiutitigut oqaaseqarsinnaasut sassartassasut ajornartorsiortoqarneranik paasititsiniaallutik. Amerlasuutigut angajoqqaat akisussaaffimminnut eqqummaarinngitsoortartut amerlapput taamaattoqartillugu inersimasut allat sassarlutik ikiuiniartassapput. Ass.KRK-Inua kusanartuliorpoq inuusuttut ajornartorsiuteqarnerinik paasititsiniaanermigut neriulluartitsilerami.

Inuusuttut politikkilu
- Qanorpiaq eqqarsarpit oqaravit angajoqqaat ilaasa akisussaaffitik eqqumaffiginngitsoortaraat?

- Inuppassuit pilliutigineqarsimasutut misiginerminniiginnartuulertartut amerlavallaarput, soorlu angajoqqaaminnit isumagineqarsimanngikkunik taanna nammineq aamma angajoqqaajulluarsinnaannginnerminnut utoqqatsissutitut patsisiuttarlugu. Iluaqutaaqqajaqaaq angajoqqaat meeqqaminnik oqaloqatiginnittartuugunik qanorlu-innerinik apersorlugit. Tamaavitta tunngavitsigut assigiippugut. Perulernermiuna qanoq immersorneqarsimaneq aaliangiisuusartoq inoqatitsinnut kingorna qanoq tunioraasinnaatiginitsinnut apeqquterujussuanngortarmat. Meeqqat tamarmik inutsialassuupput – iluarluanngitsut arlaannik ajortumeerneqarsimatinnatik, Mike Fencker Thomsen oqarpoq.

- Inuusuttut inuiaqatigiilerinermut akuliuttassagaluarpat, soorlu politikkikkut?

- Kalaallit-Nunaanni inuusuttut isummersorsinnaaneq ajorput, isumasiorneqarneq ajoramik. Uanga nalinni inuusut peroriartornerminni Naalakkersuisumik naapitsinikuunngillat. Meeqqat atuarfiannut alakkaattoqarneq ajorami. Kransekagemi inuusatut inissisimakkajunnerupput isiginnaarutitigullu hollywoodimiik isiginnaagassiat assigalugit taamaallaat takussaasarlutik. Taamannak periuseqarnerup isumaliortilertarpaatigut soqutigineqanngitsutut. Inuttut uanga naapitserusunneruvunga. Inuusuttut taamaalinerani aamma misigilissagaluarput isummersuutitik pisariaqartinneqarlutillu pingaaruteqartuusut.

Kinaluunniit peqataassooq
- Inuusuttut sunik piginnaasarpat?

- Meeqqat inuusuttullu piginnaasaqarfii immikkut sammineqartariaqarput issiatinniinnarnagit. Issiaannarusunngillat. Uanga issiatikkuminaatsuunikuugaluarlunga ajunngitsumik ingerlavunga. Nipilersoriaraangama inuusuttuni nukik takusinnaasara nukinnik aallarfigisarpara isumassarsiorfigisarlugulu tamatigorpiaq.

- Ullumikkut killiffiit qanoq tikinnikuuiuk?

- Perorsagaanikuuvunga tamatigut sapinngisara tamaat atortassagiga taannalu pitsanngoriartuaarutiginikuuara.

- Inatsisartunut inuit qinersilerunika suna neriuutigaajuk eqqarsaatiminniitikkumaaraat?

- Pingaarutilerujussuuvoq, qinerumaakkatta tigussaasumik siunertaliisimanissaa meeqqat inuusuttullu nunatsinni atukkatigut assigiimmik pitsaassulikkamik atugaqarumaalernissaannik sulissutiginninnissaminut pilersaaruteqareernissaa. Kinaluunniimmi peqataassooq, Mike Fencker Thomsen oqarpoq.

Ilanngutassiaq Kalaallit Røde Korsiat Sermitsiaq/AG-lu suleqatigiinneratigut allaaserineqartoq ilanngunneqarpoq.