Thomasip kannguttaatsuliortoq isumakkeerfigaa

Thomas Westip arfinilinnik ukioqalernerminiit 13-inik ukioqalernissami tungaanut kinguaassiutitigut atornerlunneqartarsimanini ukiorpassuarni eqqartorumasarsimanngilaa.

Atornerluinerit pillugit ullumikkut ammasumik oqaluttuartarpoq, maannalu eqqissiartulerluni.

- Kamak ilunniittoq ipararpara, inuuninnilu ingerlaqqissinnaalerlunga.

Thomas kinguaassiutitigut atornerlunneqarsimanini pillugu 2006-imi oqaluttuaqqaarpoq, suli Kalaallit Nunaanni najugaqartilluni. Taamani Qeqertarsuarmi arlaleriarluni atornerluisoqarsimasoq paasineqarpoq. Pisimasut pillugit arlallit kinaassutsiminnik isertuussillutik oqaluttuarput.

- KNR-imut sianerpunga oqarlungalu kinaassutsiga isertuunnagu oqaluttuarumallunga. Tassani aamma oqaluttuarpunga kinguaassiutitigut atornerlunneqarsimagaluarlungaluunniit, Kalaallit Nunaanni tamaavitta ataqatigiinnerput misigisinnaallugu.

Imminut paarinnginneq

Thomas kinguaassiutitigut atornerlunneqarsimaneq pillugu piviusulersaarusiami kingorna peqataavoq. Saqqummersuni angutitatuaavoq.

Kingornali ajornertunik aqqusaagaqarpoq. Piffissami tassani imigassamik hashimillu ukiuni pingasuni atuisimanngilaq.

- Imminut paarissallunga puigorpara, imigassamillu hashimillu atornerlueqqilerlunga.

Danmarkimut nuukkami angerlarsimaffeeruppoq, imigassamillu atornerluineq ingerlaannarluni. Imigassamik atornerluiunnaarami hashimik atornerluinera annertusiinnarpoq.

Ilungersuutigisanili maluginiarnerusalerpai. 2016-imilu hashimik atuiunnaarnermi kingorna, misigissutsini pillugit ammanerulerpoq.

Iliveqarfimmi allakkamik atuarpoq

Imminullu eqqissitinnerunerup kinguneranik, angut atornerluisuusimasoq eqqarsaatiminik oqaluttuutissallugu nukissaqarnerulersimavoq. Toqqaannartumilli attaviginissaanut imminut piumaffigeqqaartariaqarsimavoq.

- Siullermik allakkamik allaffigaara, taannalu iliveqarfimmi atuariarlugu. Kingorna ikuallatsippara.

Taassuma kingorna toqqaannartumik sms-ikkut attavigaa, kingorna sianerfigalugu, ullullu ilaanni naapillugu.

- Kinguaassiutitigut atornerlungaasimasut allat assigalugit kanngusunnermik imminullu pisuutinnermik nammataqarpunga. Uangaanngilarli kanngusuttussaq. Taamaammat kanngusunneq tassunga tunniuppara.

Taanna Thomasimut utoqqatsersimavoq, Thomasillu isumakkeerfigisimavaa.

- Isumakkeerfiginnikkama qamuuna eqqissineruvunga.

Atornerluisoq kinguaassiutitigut atornerlunneqarnikuusimavoq

Angut Herstedvesterimi killiligaanngitsumik pineqaatissinneqarsimavoq, meeqqanik arlalinnik atornerluisimammat. Thomas taannalu suli attaveqatigiittarput, Thomasillu nassuiaassimavaa imminut kisimi pilluni, allat pinnagit, isumakkeerfiginnissinnaalluni.

- Taassuma aamma iluaqutigaa. Aamma taanna ammanerulerpoq, oqaluttuarporlu meeraanermini aamma kinguaassiutitigut atornerlunneqarsimalluni.

Thomasip nukini maanna atorumavai paquminartuujunnaarsitsinissamut, pingaartumillu inuusuttut kinguaassiutitigut atornerlunneqarsimaneq pillugu ammasumik oqaluttuarnissaannik kaammattorumavai.

- Issiaannarsinnaanngilanga kinguaassiutitigullu atornerlunneqarsimasut misigissutsiminnit qimaasut isiginnaaginnarlugit. Inuusuttorpassuaqarpoq inuiaqatigiinnut assut kamassalinnut, uffa kamak kinguaassiutitigut atornerlunneqarnermiit pinngortuusoq.

Namminersorlutik Oqartussat iliuuseqartariaqarput

Danmarkimi najugaqaraluarluni Kalaallit Nunaanni susoqarneranik malinnaavoq. Ukiunilu kingullerni saqqummertoqartalernera nuannaarutigaa.

- Ammanerusumilli oqallittoqaraluartoq ajornartorsiutip qaangernissaanut Namminersorlutik Oqartussat suli annerusumik qanoq iliuuseqarsinnaagaluarput.

Taanna isumaqarpoq kinguaassiutitigut atornerlunneqartarneq pillugu meeqqat atuarfiini klassini minnerni oqalugiartoqartariaqartoq. Taassuma saniatigut Inatsisartuni Naalakkersuisunilu ilaasortat eqeersimaarnerusumik suliniuteqarnissaat ujartorpaa.

Timip pissusaatigut takuneqarsinnaavoq

Suliniummi Killiliisami maligassiuisut arfinillit namminneerlutik misigilittakkatik aallaavigalugit kinguaassiutitigut atornerluisoqartarneranik pinaveersaartitsissallutik suliniuteqarput.

Kinguaassiutitigullu atornerlunneqarsimasut ilisimasaat nalitoorujussuupput, Thomas isumaqarpoq.

- Inuusuttut timimikkut pissusilersuutaatigut takusinnaasarpara kinguaassiutitigut atornerlungaasimasuusut, timerami aamma taamatulli pissuseqarpoq.

Mianersortumik ikiuunnissamik neqeroorsinnaanermut tamanna periarfissiisoq, taanna isumaqarpoq.

Thomasip inuunera pillugu allaaserisat pingasut una kingullersaraat. Allaaserisat siulliit marluk ugguuna nassaarisinnaavatit: