Thomas sernissortiminit ikiorneqarpoq

Thomas West meeraanermini kinguaassiutitigut atornerlunneqarnikuunini pillugu ullumikkut ammasumik oqaluttuartarpoq. Taamaattuaannarsimanngilarli. Siornatigut allarpassuit assigalugit paqumigisimagaluarpaa. Iisartakkat, imigassat ikiaroornartorlu atorlugit eqqarsaatini ingalassimatinniartarsimavai.

Thomas arfinilinnik ukioqartoq kinguaassiutitigut atornerluinerit aallartipput, 13-inillu ukioqalernissaata tungaanut ingerlallutik. Taama pisoqarsimanera ukiorpassuarni eqqarsaatiginaveersaartarpaa. Kingunerluutilli iluaniipput.

Thomas inersimasunngorami Royal Greenlandip kilisaataani inuttaavoq. Niusimagaangami imerujussuartarpoq.

- Sapaatip akunnerali qaangiukkaangat umiartoqqittussanngortarpunga. Timinni eqqissisimajunnaarneq misigisarpara, kilisaammiileraangamali eqqissiimisarlunga.

Akunnerni sisamani qinngamigut aattoq

Timimigut eqqissisimajunnaartarnini, meeraanermini kinguaassiutitigut atornerlunneqarnerminiit pissuteqartoq ullumikkut ilisimavaa, taamanili eqqarsaatini matoorniarsarai. Tassanngaannartumilli kamajussualersinnaasarpoq.

- Kilisaammiinninni kamaammiussaqaraangama oqimaattunik kivittaarilluarniaannartarpunga. Unnukkut qasusangaarama timinni eqqissisimajunnaarneq, nunamiitsillunga malugisartagara, malugineq ajorpara, oqaluttuarpoq.

Thomas kamaleraangami kamannini toqqorniartarpaa. Kamannermini annersaasartuunani nassuiaavoq. Ukiulli 15-it matuma siorna pisimasoq eqqaamalluarpaa, Nuummi imerniartarfiup Muttenip silataani kamangaarami, kamaassani naveerujussuarpaa.

- Attunngilara, aamma attunngilaanga, kamangaaramami tupaallatsigunarpara. Tassanngaannartumilli qinngakkut aaleriasaarpunga, akunnerillu sisamat qaangiummata aatsaat aakkunnaarlunga. Nakorsaq isumaqarpoq kamannera, misigissutsinillu matoorinera pissutaasinnaasoq.

Thomas West qanittukkunni Nuummiinnermini politeeq pisumik takunnissimasoq naapippaa. Taassuma qinngamigut aarujussuarnera suli eqqaamalluarpaa.

Aqerlut aallanngitsoortut

Thomasip kamassaa, qinngakkut aannermit annertunerungaartumik kingorna kingunerluuteqarpoq. 2003-mi pingasoriarluni imminut aallaariarpoq. 2015-imilu sisamariarluni imminut nivinngariaraluarluni.

- Sernissortimma paarisimassavaannga, iluatsinngitsoortuarparami.

Thomas aperaara sernissortaata kisimik ikiorsimaneraat imaluunniit nammineq ilorpiamini piumasimannginnersoq.

- Sernissortigisimassavakka. Imminummi aallaariaraluarama aallaat oqummiuteqqavara naqittaataalu naqillugu . Aqerlulli assigiinngitsut pingasut aallanngitsoorput. Sernissorteqanngitsuuguma ullumikkut oqaluttuassara oqaluttuarinavianngikkaluarpara.

Atoqateqarniartarnera ajornakusoortoq

Inuit kinguaassiutitigut atornerlunneqarsimasut imminut toquttarnerat imminulluunniit toqoriartarnerat takornartaanngilaq. Kingunerusartut ilagaat atoqateqarniartarnerat ajornakusoortarmat. Taarseraattunik aappaqarneq imminullu paarinnginneq. Thomas aamma oqaluttuarpoq, unnuk siulleq arnamik allamik atoqateqariarluni aqaguani arnamik allamik atoqateqartarsimalluni.

- Piffissap ilaani arnaateqarpunga, illoqarfimmilu allami allamik arnaateqarlunga, sulilu illoqarfimmi allami aamma arnaateqarlunga. Oqartoqarsinnaavoq arnat taakku atornerlukkikka, oqarpoq.

Kinguaassiutitigut atornerluisoq attavigaa

Thomas 2008-mi Danmarkimiilerpoq angerlarsimaffeqanngitsutullu inuulerluni. Imigassaq kingornalu hashi atorlugit misigissutsini ingalassimaniarpai.

- Imigassamik hashimilluunniit atuigaangama ajunnginnerusutut misigisarpunga. Ullulli ilaanni imminut aperisalerpunga ilumut ajunnginnerulertarnerlunga. Atornerluinermiit qaangiiniarnerni alloriarnerit siullersaraat.

Thomas oqaluttuarpoq kinguaassiutitigut atornerlunneqarsimanini pillugu ammasumik oqaluttuartaleramili eqqissisimalluni kamakkunnaarsimallunilu. Taarseraallunilu aappaqartarunnaarsimavoq.

- Uannut tulluartuusoq ullumikkut utaqqivara.

Piffissap ilaani ima nukissanissimatigaaq, allaat kinguaassiutitigut atornerluisorisimasani attavigisimallugu.

Tamanna pillugu Thomas inuuneranut tunngasumi allaaserisami pingajuusumi naggataajusumilu atuarnerusinnaavutit. Tassani aamma oqaluttuarumaarpoq kinguaassiutitigut atornerluisarnerup annikillisinnissaanut qanoq iliortoqarsinnaanersoq.