Thomas Møller Olsenip pisuussusaa eqqartuussissuserisup qularnartuuneraraa
Thomas Møller Olsenimut suliassanngortitseqqinnermi, ullormi eqqartuussiffiusumi siullermi eqqartuussissuserisuata Polar Nanormi inuttamut allamut pisuutitsiniarsarinermut atorpaa.
Birna Brjánsdóttirip toqunneqarnera pillugu suliassanngortitseqqittoqarnerani, ulloq eqqartuussiffiusoq siulleq aatsaat nalunaaqutaq unnukkut qulinngulersoq naammassivoq. Eqqartuussineq tassani akunnernik 13-ini ingerlareersimavoq.
Thomas Møller Olsenip illersuisuata nutaap, Björgvin Jónssonip, unnerluussisussaatitaasut uppernarsaaneranni suni amigartoqarneranik paasissutissiinermut kisimiilluni akunnerit marluk atorpai.
Birna Brjánsdóttir biilimi ajortumik pineqarnera unnerluussisut saqqummiussinerattut, sullitaanit taamatut pineqarsimanera ‘ilimananngilluinnartoq’, taanna oqarpoq. Mbl.is taama allaaserisaqarpoq. Angutip aappaa biiliniittoq arnap inuusuttup toqunerani pisuusoq, biilimi takussutissat aamma uppernarsaatit allat takutikkaat, Björgvin Jónssonip oqaatigaa.
Taakku inuttat marluk unnuap ingerlanerani Birna Brjánsdóttir biilimut attartukkamut Kiamut aappaluttumut ikivaat.
Birnap toqutaanerani piffissami nalunaaqutaq 07.00 aamma 11.00 akornanni Thomas Møller Olsenip sumiissimaneranik paasissutissanik saqqummertoqanngilaq. Unnerluussisussatitaasut saqqummiineranni arnap inuusuttup imaanut iginneqarneranut piffissaq atorneqarpoq, tassanilu ipisimavoq.
Suliap eqqartuussivikkoortinneqarnerani tusagassiorfiit annertuumik malinnaatitsinerisa kingorna, tusagassiorfiit suliami nalunaaruteqarsinnaanerannut periarfissaq eqqartuussisup killilernikuuaa. Ilisimannittut allat ilisimannittut nassuiaataannik tusagassiorfinni atuarsimasaminnik sunnertinnginniassammata tamanna pivoq.
Suliassanngortitseqqinnermut sapaatip-akunneri sisamat piffissaritinneqarput.