Thomas Møller Olsen Danmarkimut nuutsinneqartoq
Angutip Birna Brjánsdottírimik toqutsisimasutut eqqartuunneqarsimasup pineqaatissiissutimi sinnera Danmarkimi atussavaa
Thomas Møller Olsen nammineq kissaateqarnermigut Danmarkimut nuutsinneqarsimavoq. RUV.is taamatut allappoq.
Siorna novembarip 23-ani Reykjavikkimi nunap eqqartuussiviani Birna Brjánsdóttirimik 20-nik ukiliummik toqutsisimasutut ukiuni
19-ini parnaarussassanngorlugu pineqaatissinneqarpoq.
Thomas Møller Olsenip nammineerluni piumasarisimavaa, pineqatissiissut Danmarkimi atorusullugu. RUV.is naapertorlugu, kissaatigisaa danskit oqartussaasuisa oktobarip aallaqqaataani akuerisimavaat. Sapaatip akunnerata siuliani sisamanngormat Islandimi Politiinit Islandimiit aallarunneqarpoq.
Vestre Fængselimi parnaarunneqartoq
RUV-mit paasissutissat naapertorlugit, Thomas Møller Olsen assammigut singernermigullu kalunnernik qilersugaasimalluni timmisartumik nalinginnaasumik assartorneqarsimavoq. Siullersaalluni timmisartumut ikitinneqarsimavoq, tunullerpaami issiatinneqarsimavoq, timmisartumillu kingullerpaalluni anisinneqarsimalluni.
Eqqartuussinermi illersuisuata Björgvin Jónssonip RUV-mut oqaluttuaraa, Thomas Møller Olsen Københavnimi Vestre Fængselimut inissinneqarsimasoq. Pineqaatissinneqarninilu tamakkerlugu tassaniiginnassanersoq oqaatigisinnaanngilaa, parnaarussivimmi pineqartoq parnaarussigallarnernut kiisalu inunnut paarnaarussivissavimminnut nuutsinneqarnissamik tungaannut inissiivittut atorneqartarmat.
Pinngitsuunerartoq
Birna Brjánsdóttir 2017-imi januaarip 14-iata unnuaani tammaaneqalerpoq. Video nakkutilliissut aqqutigalugu biilimut Rød Kiamut, Thomas Møllger Olsenimit aqunneqartumut aamma Polar Nanormi inuttamik allamik ilaasoqartumut ikisoq takuneqarsinnaavoq.
Sapaatip akunnerani ataatsimi ujaasinersuaqareersoq sissami inoqanngitsumi nassaarineqaroq. Arnaq 20-nik ukiulik persuttarneqangaatsiarsimavoq, kuummulli iginneqarami suli uumasimagaluarpoq, kuummili ipisimavoq. Kuummit imaanut tissukarsimavoq.
Thomas Møller Olsen 2017-imi januaarip 19-iani parnaarussaagallarpoq, taamanili parnaarussivimmiippoq. Piffissaq tamaat pinngitsuunerartarsimavoq.
Danmarkimut nuussiniarneq sivisuumik ingerlanneqarsimavoq, ilaatigut eqqartuussissutip nutserneqarnissaanik danskit oqartussaasuisa piumasaqarsimanerat pissutigalugu.