Thomas ernutartaarami atornerluisuujunnaarpoq

Thomas West, Erneeqqamik aamma taaneqartartoq, Københavnimi Hovedbanegårdimi isumaqatigiissutigalugu naapinnissatsinnut inortuilaarluni takkuppoq. Siullermeerluni illoqarfissuarmi takornariartitsilluni angallasseqqammerpoq, illoqarfik angerlarsimaffeqanngitsup isaaniit takutillugu. Sikkilimi usisarfianiitippaa ikinngutini, Alaskamiut qimmiat Malmuteq, Thyra.

Illoqarfimmi takornariartitsinerit isumaginninnermik suliaqartunit Gadens Stemmerimit aaqqissuunneqartarput, Middelfartillu ilinniarnertuunngorniarfianit HF-imilu atuartut 50-it sinnillit Thomasip angerlarsimaffeqanngitsutut inuusimanera pillugu tusarnaariarsimapput. Silalu qiianarluni isugutakujukkaluartoq, tusarnaartut soqutiginnilluarmata angallassineq sivisunerulaarsimavoq.

- Inuusuttut tupaallaatigaat akissarsiakkaanermiit qanoq sukkatigisumik angerlarsimaffeeruttoqarsinnaanersoq, Thomas West oqaluttuarpoq. Taassuma facebookimini inuunerisimasani isertuarani allaatigisareerpaa. 'Imerajuttuuvunga imerunnaarnikoq, ikiaroornartumik atornerluisuunikuuvunga, aningaasanoorajuttuunikuuvunga, iisartakkanillu atornerluisuunikuullunga' imminut ilisaritippoq.

Atornerluisuujunnaareersimagaluarlunilu ullaat tamaasa aalajangertariaqartarpoq suli atornerluisuujumanani.

- Imigassamik atornerluisuunikuuvunga, imerajuttuujuaannassallungalu. Ikiaroornartumik atornerluisuunikuuvunga, ikiaroorajuttuujuaannartussaallungalu. Unikkallatsiarnerinnaavoq. Ullumikkulli imminut neriorsorpunga imigassamik aalakoornartulimmik imissananga. Tunngavik taanna ullumikkut inuuneraara, Thomas nassuiaavoq.

Nunamiitilluni imerujussuartarpoq

Thomas Københavnimi ukiuni arfinilinni angerlarsimaffeqanngitsutut inuusimavoq; Nuummili najugaqarallarnermini aamma angerlarsimaffeqanngitsuusimavoq.

- Taamani taamatut isiginngilara.

Tassunga nassuiaataavoq taamani Royal Greenlandip kilisaataani inuttaagami. Nunamiitillunilu sapaatip akunnera imerujussuartarpoq, issiavissuarnilu akunnialunni sinittarluni. Sapaatip akunnera qaangiukkaangat kilisaammut ikeqqittarpoq, tassanilu imeqqusaanngillat.

Thomas Danmarkimut pereernermini aatsaat aqqusiniinnarmi inuulerpoq.

- Danmarkimut tikippunga aggustip 20-ani 2007-imi, kilisaammiit sulinngiffeqarlunga, oqaluttuarpoq.

Inimut akiliisanngilaq

Imerujussuartaqattaarnini pissutigalugu Kalaallit Nunaannut timmisartornissaraluani pingasut inortorpai, kinguneranik Royal Greenlandimi suliunnaarluni. Thomas Danmarkimi imertuarsinnarpoq - siullermik Aalborgimi kingornalu Esbjergimi, tassani kilisaammi inuttanngorniaraluarpoq iluatsitsinanili.

Esbjergimiinnermini angerlarsimaffeqanngitsut unnuisarfianni inissippoq, piffissallu ilaani ajunngitsumik ingerlagaluarluni. Kommunip sukkasuumik ikiorpaa, inissarsitillugu, Hanstholmimilu kilisaammi inuttaalerluni.

Sulinerulli sakkortuup kinguneranik qiterlulerpoq, qangali ajoqusernerisimasaa ajoquseqqippoq, napparsimmavimmullu unittariaqalerluni. Iniminulli akiliutigisartakkani aalajangersimasumik akilersuutinngortissimanngilai, Esbjergimullu uterami iniminiit anisitaareersimavoq.

- Taamani januaariuvoq 2008-mi. Hanstholmimi sømandshjemmemi siullermik inissippunga, akissarsiakkali nungukkakkit angerlarsimaffeerutivillunga. Tamassuma kingorna ukiuni arfinilinni angerlarsimaffeqanngilanga.

Københavnimut nuuppoq aqqusinermilu sinittalerluni - sumiiffiit marluk siniffiginerusarlugit.

Nammineerluni atornerluisuujunnaarpoq

Piffissarli tamaat allamik pisoqartussatut Thomasimut issimavoq.

Iniminiit anisitaaqqammitsiaannarluni imigassamik atuiunnaarpoq.

- Imigassamik aalakoornartortalimmik januaarip qulingani 2008-p kingorna imeqqinngilanga, januaarillu 20-ani 2010-mi aningaasanoorneq unitsillugu septembarip aqqarnani 2003-mi iisartakkanik atornerluinera aamma unitsivippara, oqaluttuarpoq.

Imigassamilli atornerluiunnaarami, Thomas hashimik atornerluilerpoq.

- Naggataagut ullaakkut, ualikkut unnukkullu pujortartalerpara.

Ukiulli marluk qaangiupput ernutartaarami. Ernuttaminullu nammineerluni attaveqarusukkami, atornerluinerminik unitsitsissalluni aalajangerpoq.

Thomas taamaasilluni hashimik atornerluiunnaarpoq, aammalu tassani ulloq atuiunnaarfini nalunngilaa: 10. maj 2016.

Atornerlugaaneq

Thomas Thyralu Ishøj Havnimmi umiatsiami maanna najugaqarput, umiartortoqqamut immap naasinnaanissaa suli pisariaqarluinnarpoq. Siusinaartumik soraarnerusutisiaqarpoq, angerlarsimaffeqanngitsullu aviisiannit “Hus Forbi”-mik tuniniaasarnermigut saniatigut isertitaqalaartarluni. Taassumallu saniatigut 'Gadens Stemmer'-imi takornariartitsisutut angallassisunngoqqammerluni. Takornariartitsinera siulleq iluatsilluarsimavoq. Middelfartimi ilinniartut angallassinerup kingorna ajunngilluinnartumik nalilersimavaat.

Tassunga immaqa pissutaavoq Thomasip inuunermini annernarnerpaat pillugit isertuarani oqaluttuarsinnaammat. Arfinilinnik ukioqalereernerminiit 13-inik ukioqalernissami tungaanut kinguaassiutitigut atornerlunneqartarsimavoq – anniarneq eqqarsaatillu ingalassimatinniarlugit imigassamik ikiaroornartunillu atornerluisimalluni.

Kinguaassiutitigut atornerlunneqarneq Thomasip inuuneranut qanoq kinguneqarsimanersoq, Sermitsiaq.AG-mi aqagu atuarsinnaavat.