Skip to main content

Thinghuus: RG-p ilaatigut namminersortunngorsarneqarnissaa ajunngilaq

Naalakkersuisut Siulittaasuata Naalakkersuisoqarfiata Namminersorlutik Oqartussat suliffeqarfiutaanni annersaasup, Royal Greenlandip, namminersortunngorsarneqarnissaanut periarfissanik misissuinera, Royal Greenlandimi pisortaanerup, Mikael Thinghuusip ernumassutiginngilaa.

- Royal Greenlandip namminersortunngorsarneqarnissaanut apeqqutip akuttunngitsumik qaqinneqartarnera sulisut sungiusimavaat. Naalakkersuisut Siulittaasuata Naalakkersuisoqarfiata periarfissamik misissueqqinnera ernumassutiginngilarput, Mikael Thinghuus, Sermitsiaq.AG-mut taama ilisimatitsivoq.

Royal Greenlandip kikkunnit pigineqarnissaanik piginnittut aalajangigassarigaat, Mikael Thinghuusip oqaatigaa. Taamaakkaluartoq Sermitsiaq.AG-p kajumissaaruteqarneratigut tamanna isumassarsiatsialaanersoq isumassarsiatsialaannginnersorluunniit, suliffeqarfimmi misilittagalittut aamma ilisimasalittut oqaaseqarfigerusuppaa.

Ilaatigut namminersortunngorsarneqarnissaa

- Royal Greenlandip ilaatigut namminersortunngorsarneqarnissaa takorloorsinnaavara. Akerlianik suliffeqarfik tamaat aningaasaliisartunut allaneersunut tunineqassappat isumatusaarnerussanngitsoq isumaqarpung, Mikael Thinghuus, Royal Greenlandimi ukiut arfineq-pingasut sinnerlugit pisortaanerusimasoq oqarpoq.

Taassuma ilaatigut aamma tamakkiisumik namminersortunngorsaanissaq sooq immikkoortinnerlugit nassuiarpai.

- Royal Greenland inuiaqatigiinnut akisussaaqataanermik annertuumik tigusisariaqarnera ataqqillugu ingerlanneqarpoq. Niuernerup ilaani aningaasaqarnikkut allanit iluanaarfiuallaannginneranik tamanna kinguneqarpoq. Sinerissami sumiiffinni amerlasuuni suliffeqartitsineq qulakkeerparput, taakkunani fabrikkeqarluta, Mikael Thinghuus nassuiaavoq, taassumalu Polar Seafood sinerissami amerlanngitsunik tunisassiorfeqartoq tikkuarpaa, taakkulu niuernertik unammilleqatigiinnermi atukkat allaammata annertusaasinnaapput.

Sinneqartoorut annerusoq pisinnaagaluarpoq

Royal Greenland ukiuni arlalinni angusarissaareerluni amerlanerusunik sinneqartoorsinnaagaluartoq, taassuma oqaatigaa, kisianni inuiaqatigiinni akisussaaffeqannginnermik tamanna kinguneqassagaluarpoq, naggataagullu nunatsinnut assigiinngitsorpassuarsuartigut pilliuteqarluni.

Ingerlatseqatigiiffik aningaasaliisartunit annerpaamik iluanaaruteqarniaannartumit, sinerissami nunaqarfinnut kinguneqartitsilluni inuiaqatigiinnut akisussaaneq taanna nunap isaatitsiviginerpaasaani taamaatikkaluarpat, Kalaallit Nunaannut ajoqusiissasoq, taanna isumaqarpoq.

- Ilaatigut namminersortunngorsarneqarnissaa, assersuutigalugu suliffeqarfiup 25 procentiinik soraarnerussutisiaqartitsivimmut imaluunniit 25 procentit niueqatigiittarfimmut pitinneqarsinnaasoq isumaqarluinnarpoq. Taamatut aaqqissuussaaneqartillugu inuiaqatigiinnut akisussaasoqarsinnaasoq isumaqarpunga. Aningaasaliisartunik inuiaqatigiinnut akisussaaffimmik tiguseqataarusuttunik peqarpoq, Mikael Thinghuus oqarpoq.

Tunineqarnissamut nalinga qaffarujussuartoq

Royal Greenlandip ukiorpassuarni siariartornermi kingorna, Atlantikup avannaani aalisarnermik aallutaqarluni iluatsitsinerup kingorna, ingerlatseqatigiiffiup nalinga ukiumiit ukiumut qaffakkiartuinnarnikuuvoq.

- Suliffeqarfiup ilaanik tunisinissamut piffissaalluarpoq. Nunap karsia aningaasanik millionilikkaanik qulakkeerinniffigissagaluarpaa, Mikael Thinghuus oqarpoq, taannalu allannguisinnaasumik tikkuaavoq.

- Aalisarnermut inatsisissap nutaap inernera ilisimanngilarput, aalisarnermullu inatsit inissitsinnagu aningaasaliisussanik Royal Greenlandimut aningaasaleerusussinnaasunik pilerisaarisoqarsinnaanngilaq, Mikael Thinghuus oqarpoq.

Naak 2011-mili januaarimi pisortanngoraluarluni, Mikael Thinghuus inuussutissarsiornermi allanik suliaqalernissamik pilersaaruteqanngikkallarpoq.

Aningaasaliinerit malunnaatillit

- Maanna periusissiatsinni “The North Atlantic Champion”, tassanilu Kalaallit Nunaata eqqaani aalisarneq aallupparput. Suli suliassaqaqaaq, pisortaaneq nassuiaavoq, taassumalu suliffeqarfiup aalisarnerm,i tunisassiornermi aamma tuniniaanermi malunnaatilimmik aningaasaliinissaa” oqaatigaa.

- Royal Greenlandimi sulineq nuannarisorujussuuara. Suliaq arlalitsigut isumaqartorujussuuvoq: inuussutissanik suliaqarpugut, nuna innuttaasuilu annertuumik pisariaqartitsillutillu iluaquteqartut sullippagut, Mikael Thinghuus nassuiaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER