Thinghuus: Anders nalinginnaanngitstumik ilaakuminarluinnartuusimavoq
Naak aalisarnermi unammillertigiikkaluarlutik Royal Greenlandip pisortaanera Mikael Thinghuus nersualaarutissaannarnik Polar Seafoodip pilersitsisua Anders Jonas Brøns, tallimanngornermi Aalborgip umiarsualiviani ipisoq pillugu oqaasissaqarpoq.
- Royal Greenlandip aamma Polar Seafoodip nunami assigiinnik suliaqarfiuneranni, sutigut tamatigut naapittuarfiupput – unammillertitut aamma suleqatitut, Mikael Thinghuus Sermitsiaq.AG-mut ilisimatitsivoq.
- Aalisarneq imaluunniit allarluinnaq pillugu oqaluuserinnitsilluta Anders peqatigissallugu nalinginnaanngitsumik ilakkuminartuusimavoq. Taanna inussiarnernermik silatussutsimillu takutitsisuuvoq, tamatuma peqatigerusunnarsisittarpaa, Mikael Thinghuus oqaluttuarpoq.
- Siusippallaamik toqukkut qimagunnera tamatsinnut annaasaqaataavoq annertooq, Royal Greenlandip pisortaanera naqissusiivoq.
Innuttaasunit ataqqisaasoq
Innuttaasut akornanni Anders Jonas Brøns aamma ataqqineqarluartuuvoq.
Tamanna atuartartut Sermitsiaq.AG-p alianartumik pisoqarneranik allaaserisaanut atatillugu ilanngussarpassuit takutippaat.
Atuartartut 200-t arfininngornermi nittartakkami nutaarsiassaqartitsiviup oqaaseqartarfiani inuussutissarsiortup kalaallinut inuiaqatigiinnut pingaassusaanik ataqqinninnermik takutitsillutik allagaqarput, eqqarsaatillu ilaqutaasunut aamma nassiunneqarlutik.