Thårup: Namminersorlutik Oqartussat meeqqerivinni inissaqartitsilernissamut utaqqisorpassuarnut ikiuuttariaqarpoq
Meeqqeriviliorneq kommunip suliassarigaluaraa, Namminersorlutik Oqartussat ikiuunnissaat pisariaqarpoq, taamaalilluta inuusuttut amerlanerpaat ilinniagaqalernissaat qulakkiissavarput, Kommuni Kujallermi Siumut sinnerlugu politikkeri Margrethe Thårup Andersen oqarpoq.
Margrethe Thårup Andersenip nammineq ilinniartitsisuusup misiginikuusimavaa, inuusuttu pingasut Ilinniarnertuunngorniarfimmi ilinniarnerminnik unitsitsiinnarsimanerat, tassa Qaqortumi meeqqerivinni inissanut utaqqisorpassuuneri pissutigalugu meeqqatik paarsisussaqartinnginnamikkit. Siorna aamma aasaanerani atuanngiffeqartoqareersoq ilinniarnerup aallartinnerani taamatoqqissaaq pisoqarsimavoq.
- Kommuni inuusuttut ilinniagaqartut meeraannut tallimanut inissaqartitsivoq, taakkulu naammanngilluinnarput. Akerlianilli inuussutut meeraannut meeqqerivinni inissanik tunniussiinnarsinnaanngilagut, inunnummi sulisunut tamanna akorngusiisussaavoq. Ajornartorsiut ilungersunartuuvoq, Margrethe Thårup Andersen kingullermik qinersisoqarmat kommunalpolitikkimut qinigaasoq erseqqissaavoq.
Aningaasaqarneq ilungersunartumiittoq
Taanna isumaqarpoq, Kommune Kujallermi aningaasaqarnikkut ilungersunartorsiortoqarnera eqqarsaatigalugu nuna tamakkerlugu politikkerit iliuuseqarlutillu akisussaaffimmik tigusisariaqartut, inuusuttut ilinniagaqarnissamut periarfissaarutissanngippata.
- Arnap inuusuttup ilinniagaqarusulluinnarluni meeqqani ilinniarfimminut nassartaraa takusimavata. Meeraq ilaatigut klassip atuarfiusup silataanukartinneqartariaqartarpoq. Anaanaasup ilinniagaqarusunnera nersualaagassaavoq, ilinniagaqarnerami inuiaqatigiiunitsinnut iluaqutaasussaavoq. Anaanaasulli meeqqami taamatut atugaqartittariaqarnera eqqortuusinnaanngilaq, Marianne Thårup Andersen oqarpoq.
Taassuma neriuutiginerarpaa, Namminersorlutik Oqartussat kommuni peqatigalugu aaqqiissutissarsiussasut, inuusuttut amerlanerpaat ilinniagaqarnissaat pingaaruteqarmat.
Aamma atuaruk: Nalunaarut: Ilinniartut meeqqerivinni inissaqartoqannginnera pissutigalugu ilinniarnerminnik unitsitsiinnartarput